Туриннинг “Ювентус” клуби бош мураббийи Массимилиано Аллегри Чемпионлар Лигаси финалидан олдин матбуот-анжумани ўтказди.

“Биз нимага қодирлигимизни биламиз ва ўзимизга ишонамиз. Ҳозир биз нима бўлиши мумкинлигига эмас, ўз устимизда ишлашга бор эътиборимизни қаратишимиз керак. Биз “Барселона” дарвозамизга гол уришини пойлаб ўтирмоқчи эмасмиз.

“Барса” бошқа жамоаларга нисбатан умуман бошқача ўйин намойиш қилмоқда. Биз тиғиз ўйнаб, рақибга бемалол ҳаракатланишига имкон бермаслигимиз лозим. Финал тақдирини 11 метрлик пенальтилар серияси ҳал қилиши ҳам мумкин, бироқ фикримча, бунинг эҳтимоли кам. Бироқ исталган бурилишга тайёр туришимиз лозим. Финалдаги ғалаба улкан воқеа ва мавсумнинг ажойиб якуни бўларди.

Лионель Мессини тўп билан ҳаракатланаётганда тўхтатиш мушкул. Унга қарши курашда позицияни тўғри танлай билиш керак.

Финалда бизда ижобий лаҳзалар бўлади. Хотиржамликни сақлаб, ваҳима қилмаслик керак. Бу мавсум клуб тарихига киради. Ҳар доим ҳам жамоа уч турли мусобақада бутун йўлни босиб ўта олмайди.

Финалга беш кун қолганда бизнинг лагерда ажойиб муҳит сурмоқда. Бу мавсумни янада ажойиб қила олиш қўлимиздан келармикан, кўрамиз”, деб ўз сўзларини ниҳоялади Аллегри.