Англияда Андре Виллаш-Боашнинг чемпионлигини Қандай Қабул Қилишди? Британия нашрлари португалиялик мутахассис Андре Виллаш-Боашнинг Россиядаги фаолиятини диққат билан кузатиб боряпти. Чунки у «Зенит» бошқарувини ўз қўлига олгунга қадар «Челси» ва «Тоттенхэм»да ишлаганди. Гарчи ёш мутахассис туманли ўлкада айтарли муваффақиятга эришмаган бўлсада, инглизлар ундан ҳали нигоҳ узишмаган. Хуллас, англиялик ҳамкасбларимиз Виллаш-Боашнинг Россияда чемпионлик мақомини қўлга киритганини ҳам эътиборсиз қолдирмадилар.
Guardian: «Андре Виллаш-Боаш соврин ютди, аммо танқидлар ҳеч қаерга йўқолмади». Guardian мавсум «Зенит» устози учун қандай кечганини қисқача шарҳлаб, португалиялик ўзидан норозиларни сукут сақлашга мажбур этиш учун ҳали катта кўламда иш олиб бориши лозимлигини таъкидлади. Бунга далил сифатида жамоанинг собиқ футболчиси Борис Чухлов айтган сўзлар келтирилди. У «Зенит»нинг ҳозирда зерикарли футбол кўрсатаётганини айтиб, Виллаш-Боашнинг Жозе Моуриньо билан таққослашдан маъно йўқлигини билдирган. Шунингдек, ўртага долзарб саволни ҳам ташлаган: «Клубнинг истеъдодли ёшлари қаерда қолишди?»
ВВС: «Андре Виллаш-Боаш - соврин ютган «Зенит» устози антифутбол кўрсатяпти». ВВСда чоп этилган мақола ҳам танқидий руҳда ёзилди. Шунингдек, яна Чухловнинг сўзлари келтирилди, мураббийнинг турли чемпионатларда қайд қилган кўрсаткичларини ўз ичига олган жадвал ҳам ҳавола этилди. Қолаверса, Андренинг гўёки, «Реал» бош мураббийи бўлишга номзод эканлиги хусусидаги гап-сўзларга изоҳ берилди.
Daily Mail: «Андре Виллаш-Боаш «Челси» ва «Тоттенхэм»даги муваффақиятсизлардан сўнг «Зенит»ни ғалаба сари етаклади». Ниҳоят, Daily Mail нисбатан ижобийроқ баҳо берди. Ушбу таблоид португалиялик мутахассиснинг Россияга кўчиб ўтишдан олдин қаерларда ва қандай ишлаганини қисқача ёдга солиш баробарида унинг «Уфа»га қарши кечган чемпионлик ўйинидан кейинги фикрларини келтирди. Шунингдек, хурсандчилик акс эттирилган суратларни ҳавола қилди.
