Пойтахтимиздаги “Ўзбекистон” спорт саройида бокс бўйича 1999-2000 йилларда таваллуд топган ёш чарм қўлқоп усталари ўртасида Осиё чемпионати давом этмоқда.

Эътиборлиси, мазкур қитъа чемпионатида мамлакатимизнинг умидли ёш боксчилари зафарли одимлашда давом этишмоқда.

Жумладан, оғирлик вазни 48 кг.гача бўлган чарм қўлқоп усталари баҳсида Ватанимиз шарафини ҳимоя қилаётган Баҳодир Баротов япониялик Тамура Такумини уч раунд давом этган жангда мағлубиятга учратган бўлса, 54 кг. вазн тоифасида рингга кўтарилган яна бир юртдошимиз Саиджамшид Жаъфаров ҳам кунчиқар юрт вакили Хаято Цуцумини техник нокаутга учратди.

Вазни 60 кг.гача бўлган боксчилар баҳсида ҳамюртимиз Темурбек Саъдуллаев Жанубий Корея вакили Жеонгтае Ли билан кечган баҳсда муддатидан олдин ғалаба қозонди. 63 кг. вазн тоифасида баҳсларга киришган терма жамоамиз аъзоси Темур Мержанов ҳам БАА вакили Мусо Албусига қарши кечган жангда рақибини биринчи раунддаёқ техник нокаутга учратди. Вазни 66 кг.гача бўлган чарм қўлқоп усталари иштирок этаётган мусобақада баҳсларга киришган яна бир иқтидорли спортчимиз Дилшодбек Рўзметовга ҳам қирғизистонлик рақиби Ойбек Оқилбоевни ёнгиш учун бир раунд кифоя қилди.

Бугун яна уч нафар боксчимиз рингга кўтарилади. Муроджон Алиев (-52 кг) қозоғистонлик Саматали Толтаев билан куч синашса, Бололбек Мирзараҳимов (-57 кг) Жанубий Корея вакили Жанхунг Ким билан баҳс юритади. Биринчи кунги баҳсларда БАА терма жамоаси вакили устидан ғалабага эришган Тимур Мержанов (-63 кг) бугун бўлиб ўтадиган навбатдаги жангда филиппинлик Ранжо Наполесга қарши рингга кўтарилади.

Беллашувлар Тошкент вақти билан соат 16:00да бошланади.