Равшан Ҳайдаров устозлигидаги Ўзбекистон ёшлар терма жамоаси Янги Зеландия яшил майдонларида ўтаётган U-20 Жаҳон чемпионатидан қайтиб келди.
Футболчиларимизни Тошкент халқаро аэропортида кўпсонли мухлислар ҳамда футболимиз жамоатчилиги аҳли кутиб олди. Кичик мундиалда терма жамоамиз мудофаа чизиғи мустаҳкамлигини сақлашда фаоллиги билан ажралиб турган ҳимоячи Рустам Ашурматов SPORTS.uz сайти мухбирига ўз таассуротларини бўлишди.
- Умуман олганда Жаҳон чемпионати ёмон ўтмади. Ташкилотчилик, стадионлардаги муҳит ҳамда яратилган шароитлар барчаси аъло даражада бўлди. Таассуротларимиз фақат ижобий. Лекин қайд этган натижамиздан, тўғрисини айтадиган бўлсам, кўнглимиз тўлмади. Биз бунданда кўпроғини истагандик ва бунинг учун ҳаракат қилдик ҳам. Аммо хал қилувчи паллаларда омад бироз етишмади ва чорак финалдан кейиноқ уйга қайтишга мажбур бўлдик.
Мундиал давомида бизни қўллаб-қувватлаб турган кўпсонли мухлисларга миннатдорчилик билдирамиз. Уларнинг далдасини доимо ҳис этиб турдик. Юртимиздаги кўплаб мухлисларни медаллар билан хурсанд қилишни ният қилгандик. Аммо якунда бундай бўлиб чиқмади. Илгари ҳам ёшлар терма жамоаларимиз Жаҳон чемпионатларида иштирок этишган.
Биз уларнинг натижаларини янада яхшиламоқчи эдик.
Олдинги мундиалларда ўйнаган бир қатор футболчилар кейинчалик кўринмай қолишганди. Аммо бу гал ундай бўлмаслигига ҳаракат қиламиз. Жамоадаги барча йигитлар келишиб олдик: Биз энди янада яхшироқ ўз устимизда ишлаймиз ва олимпия, сўнгра Миллий терма жамоа сафидан жой эгаллаш учун ҳаракат қиламиз. Насиб этса бош жамоамиз сафида ҳам мундиалда ўйнаймиз. Эндиги навбат катталар ўртасидаги мундиалга!, - дейди ёш ва умидли футболчи.
