Ўйиндан кейинги матбуот анжуманида ҳар икки жамоа бош мураббийлари учрашув ҳақида фикрларини билдириб ўтишди.

Самвел БАБАЯН ("Пахтакор" бош мураббийи): - Ғалаба ва кейинги босқичга чиқиш учун зарур бўлган ишни амалга оширдик. Камроқ ўйин амалиётига эга бўлган йигитларга имконият бердик. Футболчилар барибир кучни тежаб ҳаракат қилишди. Шу сабабли иккинчи бўлимда баъзи хатолар юзага келди. Буларни алоҳида кўриб чиқамиз. Лобанов танаффусдан кейин бир қатор ҳолатларда ўзини кўрсатди.

Терма жамоага бош мураббий этиб тайинланишим мен учун кутилмаган ҳол бўлди. Бу мен учун катта фахр. "Пахтакор"да ким ишлашидан қатъи назар тизим давом этиши керак. Мен шуни мақсад қилгандим. "Пахтакор" ўзбек футболининг байроқдори бўлиб қолаверади.

Мухтор ҚУРБОНОВ ("Шўртан" бош мураббийи): - Охирги ўйинда йигитлар руҳан синиб қолишди, бироқ барибир вазиятни ўзгартира олмадик. Мезбонлар ўйинни жуда фаол бошлашди. Лобанов иккинчи бўлимда яхши ҳаракат қилди ва "Пахтакор" чорак финалга чиқди. Рақибни кейинги босқичга ҳақли равишда йўл олганини таъкидлашим лозим.

Ҳужумчилар борасида катта муаммолар бор. Улар тўпни сўраш, позицияни тўғри танлаш, вазиятга чиқиб боришда ёмон ўйнашяпти. Ҳимоядаги камчиликларимизни ҳал қилишимиз керак. Аста-секинлик билан ўйинимизни яхши савияга чиқариб боришга интиламиз.