Ўзбекистон Кубоги нимчорак финал жавоб баҳси “Насаф” – “Оқ-тепа” (3:1) учрашувидан сўнг мезбонлар бош мураббийи Рўзиқул Бердиев ўз фикрлари билан ўртоқлашди.

"Асосий вазифамиз кейинги босқичга ўтиш эди ва буни уддаладик. Бу ўйинда асосан ёш футболчиларга имкон бердик. Ўйлайманки, улар бугун ёмон ҳаракат қилишмади. Тўғри, тажриба камлиги билинди. Лекин шунақанги учрашувлар орқали улар тажриба тўплаб боришади. Муҳими ғалабага эришдик. Клуб академияси тарбияланувчиларини майдонга тушириб бормоқдамиз ва бунга жиддий эътибор қаратганмиз. Кубокдаги баъзи ўйинларда уларга имконият бериб, кўп футболчиларни синаб оляпмиз. Аста-секин уларни тажрибаларини ошириб бориш мақсадимиз. Рой Рок ҳали биз билан бирга шуғулланмаяпти. Унинг жароҳатини жиддий дея олмайман. Бироқ шифокорлар ҳали унга машғулотларга иштирок этишига рухсат беришмаган. Агарда Рой Рок “Пахтакор” билан ўйинда майдонга туша олмайдиган бўлса, унда Сайфиевни унинг ўрнига ҳимояда ўйнатамиз. “Бунёдкор” билан ўйинда ҳам Рок иштирок этолмаганди ва Сайфиев унинг ўрнини эгаллаганди. Ўйлайманки, Сайфиев ўшанда ёмон ҳаракат қилмаганди“, – дейди Рўзиқул Бердиев.