«Динамо» - «Андижон» учрашувидан сўнг мезбонлар бош мураббийи Тачмурод Агамуродов журналистлар саволларига жавоб қайтарди, дея хабар бермоқда “Динамо” расмий сайти.
- Бугунги ўйин натижаси ва шогирдларим ҳаракатидан қониқдим. Ўйиндан олдин таркибимизда бир қатор муаммолар боис, асосий таркиб борасида анча бош қотиришга тўғри келди. Якунда маҳаллий ёшларга ишонишга қарор қилдим ва улар ҳам бугун ишончни оқлашди. Майдоннинг ҳар бир қаричи учун кураш кечди. Йигитлар ўзларини аяшмади ва мухлисларимиз қаршисидаги давранинг сўнгги ўйинида ғалаба учун бор куч ва имкониятларини ишга солишди. Футболчиларга раҳмат дейман.
- Жамоанинг ва сизнинг кейинги режаларингиз ҳақида нима дея оласиз?
- Бу борада ҳали ҳеч нарса айта олмайман. Чунки ҳозирги ҳолатда эртага нима бўлишини билмайман. Биринчи даврани якунлаб олайлик, ундан сўнг барчасини таҳлил қилиб, қандайдир қарор қабул қилиш мумкин.
- Таркибда муаммолар катталиги кўриниб турибди. Акмал Холмуродов, Николай Чипев, Павел Смоляченко ва бугун жароҳат олган Максимилиан Фоминнинг ҳолати қандай?
- Акмал Холмуродовнинг фарзанди шифохонада реанимацияда ётибди. Бундай пайтда уни безовта қилиш нотўғри бўларди. Смоляченко эса Тошкентда жароҳатини даволатмоқда. Чиев эса ўтган турда ҳакам томонидан четлатилгани учун таркибда йўқ. Фомин эса бугунги ўйинга жароҳати билан тўп сурганди. Унинг қўли синган. Шунга қарамай, майдонга тушиб, яккакурашларга бой ўтган ўйинда яна жароҳатини янгилади.
- «Динамо»дан кетганингиз ҳақидаги миш-мишларга ойдинлик киритсангиз…
- Мен икки кунга уйимга - Туркманистонга бориб келишим керак эди. Йўлда бу ҳақдаги хабарларни ўқидим. Бундай гап-сўзлар асосга эга эмас. «Динамо»дан ҳали ҳеч қаерга кетганим йўқ. Жамоа билан биргаман.
