АҚШ ҳукумати Швейцарияга коррупция иши бўйича қўлга олинган ФИФА мансабдорларини экстрадиция қилишни сўраб расмий мурожаатнома йўллади. Бу ҳақда Reuters агентлиги хабар бермоқда.

Сўров 2015 йилнинг 20 май куни расмийлаштирилган қамоққа олиш рухсатномалари асосида юборилган. Уларни тилга олинган мансабдорлар томонидан 100 млн доллар олингани устидан иш олиб борган Нью-Йорк штати шарқий округи суди чиқарган эди. Экстрадиция қарори кейинги 14-28 кун ичида қабул қилинади.

Цюрих полицияси 27 май куни АҚШ суди сўровномасига биноан ФИФАнинг 7 нафар олий мартабали мансабдорини ҳибсга олган эди. АҚШ адлия вазирлиги қўлидаги маълумотларга қараганда, улар 24 йил ичида 150 млн доллар пора олган.

Шунингдек, Швейцарияда бу пулларни “ювиш” билан боғлиқ бир гуруҳ номаълум шахсларга қарши ҳам жиноят иши очилди.