Тошкентнинг “Локомотив” жамоасида тўп суриб келаётган черногориялик ярим ҳимоячи Дамир Кояшевич “темирйўлчилар” сафини тарк этди. 28 ёшли маҳоратли футболчи билан боғланганимизда, у кетишининг сабабини қуйидагича изоҳлади:

- “Локомотив” жамоасида қолишим ҳам мумкин эди. Жамоа бунга қарши эмас эди. Аммо ўзим кетишни истадим. Сабаби у ердаги шароитга кўникиб кета олмадим. Яна “Астана” жамоаси лагерига келиб қўшилдим. Чунки мен ҳали ҳамон қозоқ клуби ўйинчисиман. Ушбу жамоа билан тузган шартномам шу йилнинг сўнггига қадар мўлжалланган. Эндиги фаолиятим қандай кечишини яқин кунлар ичида “Астана” раҳбарияти билан гаплашиб оламиз, - дейди Кояшевич SPORTS.uz сайтига.

Таъкидлаб ўтамиз, Дамир Кояшевич шу йил аввалида “Локомотив”га Қозоғистоннинг “Астана” жамоасидан ижара асосида келиб қўшилганди. Футболчи 2012 йилда Подгорицанинг “Будучность” жамоасидан қозоқ жамоасига кўчиб ўтганди ва шундан буён “Астана” сафида ўйнаб келади. Унинг амалдаги шартномаси 2015 йил якунига қадар мўлжалланган.