Россия, Украина ва Сербия миллий чемпионатларининг янги мавсуми старт олди. Демак, ушбу чемпионатларда фаолият юритаётган ўзбекистонлик легионерлар ҳам расмий ўйинларга киришишди.
МУВАФФАҚИЯТЛИ СТАРТ
«Уфа» ва «Локомотив» жамоалари Россия премьер-лигасини муваффақиятли бошлашди. Бошқирдистонликлар Москвада «Спартак» билан дуранг ўйнашди — 2:2. Ҳамюртимиз Вагиз Галиулин 57-дақиқада захирадан майдонга тушди. «Темирйўлчилар» эса сафарда муҳим ғалабани нишонлашди. Улар «Мордовия»ни минимал ҳисобда енгишди. Виталий Денисов мазкур баҳсда тўлиқ ҳаракатланди.
АНЗУР - ҚУТҚАРУВЧИ
Ўтган ҳафта Хитойнинг «Чанчун Ятай» клубида фаолият олиб бораётган Анзур Исмоилов учун ёмон келмади. Унинг жамоаси супер-лиганинг 2та ўйинида майдонга тушиб, 4 очко олди. Қолаверса, ҳамюртимиз «Жиангсу»га қарши учрашувнинг 82-дақиқасида гол уриб, жамоасини мағлубиятдан қутқариб қолди. Бу Исмоиловнинг ушбу мавсумдаги илк голидир.
Оқибатли ЙИГИТЛАР ТАЪСИРИ
«Ворскла» клуби ярим ҳимоячиси Санжар Турсунов Украина матбуотига берган интервьюясида БАА, Саудия Арабистони ва Қозоғистон клубларидан тушган таклифларни рад этганини айтиб ўтди. «Ҳа, бир қатор клублардан таклифлар олдим. Аниқ номларни айтишни истамайман, аммо БАА, Саудия Арабистони ва Қозоғистондан чорлов бўлганини билдиришим мумкин. Бу таклифлар молиявий жиҳатдан анча яхши эди, албатта. Аммо Полтавада қолишга қарор қилдим. Зеро, «Ворскла»да ажойиб жамоа, мақсади ҳам жиддий. Энг муҳими - мураббийлар менга ишонишади. Боз устига, Европа Лигасида иштирок этадиган жамоадан қандай кетиш мумкин? Таркибимизда яхши футболчилар тўпланишган. Айниқса, тўйимга ярим жамоа меҳмон бўлиб борганини кўргач, «Ворскла»да қолиш хоҳиши яна-да кучайди. Бундай оқибатли йигитлар билан бир жамоада ўйнаш ҳар доим ёқимли. Шу сабабли, Полтавага белгиланганидан икки кун олдин қўнғироқ қилдим ва янги шартнома имзолашга розилик билдирдим», - деди Турсунов.
«Ворскла» янги мавсумнинг дастлабки турида «Волин»ни қабул қилди. Ҳамюртимиз ўйинни бошланғич таркибда бошлади. 20-дақиқада айнан Турсуновнинг зарбасидан сўнг тўп дарвоза устунига тегиб қайтди. Санжар 79-дақиқада захирага олинди. Учрашувда эса дуранг натижа қайд этилди - 1:1. Ҳар 2та гол иккинчи бўлимда урилди.
57 ДАҚИҚАЛИК ҲАРАКАТ
Аввалги мавсумни қуйи дивизионда ўтказиб, Сербия супер-лигасида иштирок этиш ҳуқуқини қўлга киритган «Явор» жамоаси 1-турда «Нови Пазар» меҳмони бўлди. Ўзбекистонлик Ҳусниддин Ғофуров ўйинни «Явор»нинг бошланғич таркибида бошлади ва 57-дақиқада жароҳат сабаб, алмаштирилди. Ўйин тугашига 3 дақиқа қолганида, иваницаликлар ғалаба тўпини киритишга муваффақ бўлишди. Шу тариқа «Явор» сафардаги қимматли ғалаба билан старт олди.
Ғалаба ва дуранг
Александр Гейнрихнинг клуби - «Ордабаси» ўз майдонида «Оқжетпес» устидан ғалаба қозонди - 2:1. «Жетису» эса (Бобур Давлатовнинг янги жамоаси) сафарда «Астана»га имкониятни бой берди. Александр асосий таркибда майдонга тушиб, 81-дақиқагача ҳаракат қилган бўлса, Бобур захира ўриндиғида қолди.
ТАНАФФУС
Жанубий Корея «К»-лигасида иккинчи босқич ўйинлари ҳали бошланмади, Малайзия биринчи лигасида эса қисқа танаффус эълон қилинди.
