Швейцария полицияси қизиқчи Саймон Бродкинга ФИФА президенти Йозеф Блаттерга қарши ўтказилган акция пайтида ишлатилган 600 долларни қайтарди.
«Мен ҳеч нарса йўқотмадим. Боиси, менга пулларни қайтаришди. Шуни ишонтириб айта оламанки, ФИФАдан фарқли ўлароқ, Швейцария полициясида коррупция йўқ. Улар менга сўнгги тийинимгача қайтаришди», – дейди Бродкин.
Қизиқчининг таъкидлашича, акцияда ишлатилган пуллар ўзига тегишли бўлиб, улар сохта эмас, ҳақиқий банкнотлардир.
Эслатиб ўтамиз, Нелсон Ли таҳаллуси билан танилган қизиқчи матбуот анжумани пайтида ФИФА президенти Блаттернинг олдига келди ва унинг устидан пул сочди ва ЖЧ-2026нинг КХДРда ўтишини сотиб олганини айтиб ўтганди.
