«Рома» ярим ҳимоячиси Ража Наингголан жамоаси билан шартномани узайтирганига изоҳ бериб ўтди.

«Мен ҳамиша "Рома"да ўйнашни истайман. Бунга ҳеч қанақа шак-шабҳам йўқ. Икки йил олдин ҳам менга таклифлар кўп эди, аммо мен "Рома"ни танладим. Бу ердаги фаолиятимнинг дастлабки 18 ойи яхши ўтди. Мен бу лойиҳага ишонаман.

Соврин ютиш учун юлдузли жамоага ўтиш шарт эмас. Мен "Рома" билан ғалаба қозонишни истайман. «Ювентус» билан 10та соврин ютгандан кўра, «Рома» билан 1та соврин ютганим яхшироқ. Илк марта бу ерга келганимда қизиқарли лойиҳа деб ҳисоблаганман ва ҳамон бунга ишонаман. Жамоанинг келажагига ишонаман. Шартномани узайтирганимдан хурсандман», – дейди Наингголан.