АҚШ ва Канада мамлакатлари мезбонлик қилган КОНКАКАФ кубогида Панама терма жамоаси эътиборга молик натижани қайд этди. Гап уларнинг бронза медалини қўлга киритганида эмас, ушбу натижани қай тарзда қайд этишганларида.

Гап шундаки, панамаликлар мусобақа давомида олтита ўйин ўтказишди ва барча ўйинларда бир хил — 1:1 ҳисоби (ўйиннинг асосий вақтида) қайд этилди. Панама гуруҳ босқичида Гаити, Гондурас ва АҚШ билан дуранг ўйнади. Барчаси — 1:1. Улар гуруҳда 3-ўрин билан чорак финалга чиқишди.

Чорак финалда Тринидад ва Тобаго билан тўқнаш келинди. Ўйиннинг асосий вақтида ҳам айнан 1:1 ҳисоби қайд этилди ва бу ҳисоб қўшимча бўлимларда ҳам ўзгармади. Пенальтилар сериясида эса томонлар 9 мартадан зарбани амалга оширишди ҳамда Панама 6:5 ҳисобида устун келди.

Панама ярим финалда Мексикани асосий вақтда мағлуб этиши мумкин эди, аммо иккинчи бўлимга қўшиб берилган дақиқаларда ҳакам нотўғри қўйиши натижасида ҳисоб тенглашди — 1:1. Мексикаликлар қўшимча бўлимларда гол уриб, финалга йўл олишди.

Бугун бўлиб ўтган 3-ўрин учун баҳсда панамаликлар яна АҚШ билан тўқнаш келишди. Бу сафар ҳам ўйиннинг асосий ва қўшимча бўлимлари ўша 1:1, пенальтилар сериясида Панаманинг қўли баланд келди — 3:2.

Шу тариқа, Панама терма жамоаси ўзига хос услубда қитъа чемпионатининг бронза медалини қўлга киритди.