Давралар оралиғида қисқа муддатли таътилни ўтказиб, кейинги даврага тайёргарлик кўраётган “Насаф” жамоаси айни кунларда Қарши шаҳридаги ўз қароргоҳида машғулотлар олиб бормоқда.

Жамоанинг икки нафар легионери Артур Геворкян ва Рой Роклар бугун Тошкент шаҳрида тиббий кўрикдан ўтишмоқда. Улар бугуннинг ўзида Қаршига шаҳрига, жамоа сафига қўшилиши кутилмоқда.

Кейинги пайтда мухлисларнинг энг кўп қизиқтирган савол, таркибдаги қандай ўзгариш бўлиши ҳақида бўлиб қолмоқда. Олий лига иштирокчиларининг кўпчилиги ўз сафини кучли ёки фойдали ўйинчилар билан тўлдиришда давом этишмоқда. Аммо афсуски “Насаф” жамоаси таркибида “кетди”лар бор-у, “келди”лар ҳақида эшитмаяпмиз.

Аввалроқ бизга маълум бўлишича, “Насаф” клуби раҳбарияти мураббийлар билан биргаликда, жамоага янги кучларни қўшиб олиш ҳақида режалари борлиги ҳақида эшитган эдик. Бу ҳақда “овоза” қилишга ҳам улгурдик. Афсуски, бу янгиликлар ҳозиргача янгилигича қолмоқда.

Бизнингча бу масаланинг ҳамон ҳал бўлмагани клубнинг молиявий жиҳатдан “қўли калталиги” сабаб бўлса керак, аксинча бу масалани ижобий ҳал қилишда бошқа “тўсиқ”нинг ўзи йўқ.

Аммо миллий чемпионатимизнинг давралараро трансфер “ойнси” ёпилишига ҳал вақт борлигини ҳисобга олсак, умид қилишда давом этамиз. Акс ҳолда “Насаф”дек юқори ўринлар учун курашадиган жамоага иккинчи даврада бироз қийин бўлиши турган гап.