"Уфа" жамоасининг 18 ёшли украиналик ярим ҳимоячиси Александр Зинченко Россия фуқаролигини рад этди. Бу ҳақда уфаликлар жамоаси бош директори Шамиль Газизов ТАСС нашрига маълум қилган.
"У Украина фуқароси бўлиб қолишни истади. Бу унга келгусида Европа топ-клубларида ўйнаши учун қулайлик яратади. Айни вақтда унга Европа жамоаларидан қизиқиш мавжуд. Ёзги трансферлар вақтида уни трансфер қилишимиз мумкин. Мен шахсан уни жуда истеъдодли футболчи ва бўлажак юлдуз сифатида биламан", дейди Газизов.
Маълумот учун, "Уфа" бу ёш футболчи билан шу йилнинг февралида 4 йиллик шартнома измолаган. У 25 июль куни "Уфа" таркибида "Ростов"га қарши ўйинда ўзининг илк голини нишонлаганди. Зинченко Донецкнинг "Шахтёр" жамоаси тарбияланувчиси ҳисобланади ва 2013 йилнинг ёзида Россияга келиб, аввалига "Рубин"да, бироз ўтиб "Уфа"да ҳаракат қила бошлаганди.
Зинченко Украина ёшлар терма жамоаси сафида 2013 йилги Европа чемпионатида қатнашган ва турнирнинг рамзий терма жамоаси сафига кирганди.