Робин ван Перси, Нани ҳамда Уэсли Снейдер сингари жаҳон футболи юлдузлари бу саволга жавоб беришди: чунки Туркия - энг кам солиқ олинадиган мамлакатлардан бири.

Фаолиятини Туркия суперлигаси билан боғлаган футболчилар даромад суммасидан қатъий назар 15 фоиз миқдорида солиқ тўлашади. 1-дивизионда мазкур кўрсаткич 10 фоизни ташкил этади.

Оддий турклар билан солиштирганда, футболчиларга бу борада имтиёз белгилангани аёнлашади. Масалан, бошқа касб орқали ойига тахминан 2200 лира (756 евро) маош олувчилар даромадларининг 27 фоизини давлат ҳисобига ўтказишади. Бундай шарт-шароит юқори солиқли Европа давлатларидан чарчаган ўйинчилар учун айни муддао.

Жумладан, Испанияда бу кўрсаткич 56 фоизни ташкил этса, Португалияда 56,5, Германияда 47,5, Италияда 46 ва Англияда 45 фоизга тенг (рақамлар Ernst&Young тадқиқотларига асосан белгиланган).

Туркия Молия вазирлиги икки йил аввал футболчиларга белгиланган имтиёздан воз кечиш таклифи билан чиққан, бироқ солиқ қонунчилигида бундай янгиликка қўл уришга шошилмагандилар. Бир жиҳатдан тўғри қарор. Акс ҳолда, ван Перси ушбу мамлакатни четлаб ўтиши аниқ эди.