Янги мавсум арафасида "Кубань" жамоаси футболчисига айланган Андрей Аршавин шарҳловчи Геннадий Орлов ёзган китоби учун қилган суҳбатида россиялик футбол мураббийларига ишонмаслиги ҳақида айтиб ўтган. Бу китобдан парчалар «Советский спорт» нашрида чоп этилган.

"Мен рус мураббийларга буткул ишончсиз муносабатдаман. Мен кўрган россиялик мураббийларнинг барчаси рақибдан қўрқишар ва шунга яраша услуб танлашарди. Уларнинг қўрқоқлигини футболчилар сезиб туришади. Бундайлар ўйинчи алмаштиришда ва услубни ўзгартиришда ўз қўрқоқликларини кўрсатиб қўйишади", дейди Аршавин.

Аршавин россиялик мураббийларга голландиялик мутахассис Дик Адвокатни намуна сифатида кўрсатиб ўтган. У бу мураббий раҳбарлигида "Зенит"да (2006-2008) ҳамда Россия терма жамоасида (2010-2012) ўтказган даврини эслайди ва мураббий ҳеч қачон ўйинларда рақибдан қўрқмаганини эътироф этади.

34 ёшли Аршавин футболчилик фаолиятининг асосий қисмини "Зенит" ва "Арсенал" жамоаларида ўтказди. Шу йилнинг 13 июлида у эркин агент мақомида "Кубань" жамоаси сафига келиб қўшилди. "Кубань"ни айни дамда россиялик мураббий Дмитрий Хохлов бошқаради.

Аршавин Россия чемпионатининг янги мавсумида ўтказилган 2 туридан биттасида майдонга тушиб, 84 дақиқагача ҳаракат қилди ва сариқ карточка олди.