“Сўғдиёна”-“Шўртан” (0:2) учрашувидан кейинги матбуот анжуманида “Шўртан” жамоаси бош мураббийи Муҳтор Қурбонов иштирок этди.

– Ўйлайманки бугунги ўйин анча қизиқарли бўлди. Очколар ҳар иккала жамоага ҳам керак эди. Биз бугун ҳаққоний ғалабага эришдик. Уйдаги ўйинимизда “Нефтчи” устидан қозонилган ғалаба йигитларни анча руҳлантирганди. “Сўғдиёна” ҳам ёмон ўйин кўрсатмади. Фақатгина ўша иккинчи бўлимда киритилган тезкор икки гол бизга фойда келтирди. Бугунги ўйин учун йигитларга катта раҳмат айтаман.

Иккинчи даврада биринчи даврада йўл қўйган ҳатоларимизни тўғирлашга ҳаракат қилаяпмиз. Имкон қадар ҳужумкор ўйин кўрсатаяпмиз. “Бунёдкор”, “Локомотив” жамоалари билан бўладиган ўйинлардаям иккита ҳужумчи билан ҳаракат қиламиз. Бунда эса ҳимоячиларимизга ҳам енгилроқ бўлади.

“Сўғдиёна” олий лигада қолишга бемалол кучи етади деб айта оламан. Футболчиларнинг барчаси маҳаллий ва ёш йигитлардан ташкил топган. Фақатгина маҳорат бобида бироз омад етишмаяпти. Энг асосийси йигитларда шижоат бор.

Менинг ўзим ҳам футболчилик даврларимда Жиззахда ўйнаганман. Ўша вақтлари ҳам стадион мухлислар билан тўлиб тошарди. Жиззах халқи футболни жудаям яхши кўради. Ман ўз шогирдларимни ҳам огоҳлантиргандим. Стадион мухлисларга тўлади, ҳаяжонланмасдан ҳаракат қилинглар, деб. Гарчи мен рақиб жамоа вакили бўлсам ҳам мухлисларга ҳавасим келди. Уларга ўз жамоаларини қўллаб-қувватлаб турганликлари учун раҳмат айтаман.