“Қизилқум” — “Насаф” учрашувидан сўнг ўтган матбуот анжумани иккинчи қисмида мезбонлар бош менежери Ҳамиджон Актамов журналистлар қизиқтирган саволларга жавоб қайтарди.

“Насаф” тажриба ва маҳорат бобида чемпионатимиз етакчиларидан саналади, — деди Ҳамиджон Ғуломович. — Бугун жамоамиз уларга қарши ёмон ўйин намойиш этишмади. Тан олиш керак, “Насаф” таркиби охирги тўрт-беш йилда деярли ўзгаришларсиз майдонга тушиб келмоқда. Бугун йигитларимизда ғалаба учун иштиёқ нечоғли юқори бўлмасин, якунда барибир тажриба ўз сўзини айтди. Шунга қарамай, жамоамизни уюшқоқлик билан қўллаб-қувватлаб турган кўпсонли мухлисларимизга раҳмат айтаман.

Афсуски, охирги учрашувларда айрим ўйинчиларимиздаги жароҳатлар таркибда муаммо келтириб чиқармоқда. Шу боис, чемпионат тўпурари Баҳриддин Ваҳобовни захирада қолдиришга мажбур бўлдик. Бироқ унинг иккинчи бўлимда майдонга туширилиши жамоамиз ўйинини кучайтирди. Жароҳатдан сўнг, ярим ҳимоячимиз Фарруҳ Ҳайдаровнинг ҳам бугун ўйинга киришиб кетиши қийин бўлди.

Гарчи, бугун натижадан қониқмаган бўлсам-да, жамоамиз ўйинидан кўнглим тўлди. Йигитларга раҳмат айтаман. Келгуси турларда очко йўқотишга ҳаққимиз йўқ. Кейинги турда Андижонга сафар қиламиз. Унда албатта мухлисларимизни хурсанд қилиш учун бор куч-имкониятимизни ишга соламиз.