Миллий чемпионатимизда Ғузорнинг ”Шўртан” жамоасини ўрни салмоқлидир. Шу боис ҳам жамоанинг иккинчи даврадаги учрашувлари ажабмас, кўпчилик мухлисларни олқишига сазовор бўлаётган бўлса.

Иккинчи даврада “Шўртан” жамоасининг биринчи даврадаги кўрсатган натижаларига нисбатан анча ижобий бўлмоқда. Жамоанинг ютуқлари айни пайтда воҳа футбол ишқибозлари ўртасида асосий мавзуга айланди. Шуни ҳисобга олиб, жамоа бош мураббийидан “Шўртан” – “Пахтакор” учрашувидан сўнг ўтган учрашув ва навбатдаги учрашув ҳақида алоҳида сайтимиз учун фикрларини ўртоқлашишини сўрадик.

– Мухтор ака аввало бугунги ўйин ҳақида қисқча тўхталиб ўтсангиз?

-Ўзларингиз гувоҳ бўлдиларингиз бугун чиройли ўйин бўлмаган бўлиши мумкин, лекин чемпионга қарши жамоамиз йигитлари бугун характер кўрсатди. Кейинги пайтда ана шу ҳолат жамоамизда шаклланиб бормоқда. Бунга иккинчи даврадаги ўйинларимиз натижалари ҳам исбот бўла олади. Жамоамиз тўғри йулдан кетаяпти деб, ўйлайман. Йигитлар ҳам бугун бор кучи билан ҳаракат қилишди. Амалдаги чемпиондан ва чемпионатимиз пешқадамидан ҳар доим ҳам ҳамма жамоа очко ололмайди. Мен йигитлардан миннатдорман бугун улар буни уддалашди.

–Бугунги кескин кечган учрашувдаги дуранг, сизнингча ғалабага тенгми?

-Албатта, “Пахтакор”дек жамоа билан дуранг ўйнаш, ғалабага тенг деса ҳам бўлади, аслида ғалаба учун майдонга тушган эдик.

–“Пахтакор” жамоаси “Шўртан”га нисбатан анча қўпол ўйнади.

-Тўғри, бугун бизни йигитлар ҳам чемпионга қарши жиддий рақобат кўрсатишди, буни албатта “Пахтакор” жамоаси кутмагандир, йигитлар бир-икки вазиятларда ўйин тизгинини бериб қуйди. Қолаверса, ўйин охиридаги пенальтидан олдин, Егор Кримец кўзимизни олдида тўпсиз футболчимизни четга итариб юборди. Бу вазиятда сариқ ёки қизил карточка кўрсатилиши керак эди. Ҳакам бу вазиятга эътибор бермади, бундан кейин эса у 90+5 дақиқада дарвозамизга пенальти қуйиб берди. Бу вазиятни таҳлил қилиб кўрамиз. Ҳар ҳолда пенальти голга айланмай қолди, акс ҳолда йигитларнинг шунча қилган меҳнати пучга чиқар эди, шунингдек бу уларнинг руҳий ҳолатига ҳам салбий таъсир кўрсатар эди. Шу борада сизнинг фикрингизга қўшиламан, “Пахтакор” жамоаси бугун майдонда ўйинчиларимизга нисбатан қўполроқ ҳаракат қилишди.

–Андреев пенальтини амалга ошира олмади, бугун Роман Абдулов ҳам яхши ўйин кўрсатди.

-Роман Абдулов бизда иккинчи дарвозабон ҳисобланади, “Пахтакор” жамоасига тегишли бўлган асосий дарвозабонимиз Элдор Тожибоевни ўзаро тузилган шартнома шартларига кўра, бугун “Пахтакор”га қарши майдонга тушира олмасдик. Дарвозамизни Романга ишониб топширишга мажбур эдик. Аммо у бугун биз кутганданда яхши ўйин кўрсатди, унинг бугунги натижада катта ҳиссаси бор. Тўғриси, ўзим ҳам кутмаган эдим, у жудаям ўзига ишонган ҳолда, дарвозани аъло даражада қўриқлади, тўғриси Р.Абдуловдан мажбурий фойдаланишимиз битта мени эмас, кўпчиликни хавотирга солаётган эди, кўриб турганингиздек у бизни ишонимизни ортиғи билан бажарди, ҳа, футболда ҳамма нарса бўлиб туради.

-“Шўртан”нинг қайси чизиқларини яга кучайтириш керак деб, ўйлайсиз?

-Мен олдин ҳам гапириб ўтганман, қўлимиздан келганча ҳозирги шароитдан келиб чиқиб, иккинчи даврада иккита учта ўйинчи олдик холос, бошқа ўйинчи олмадик. Шу йигитларни аҳил қила олдик. Ўйлайманки, бугунги ўйиндан кейин йигитларимизда навбатдаги “Насаф” жамоасига қарши ўйинда руҳий мадад бўлади. Бари – бир кетма-кет кучли жамоаларга қарши ўйинлар ўтказишни ўзи бўлмайди. Аммо, йигитларимизнинг аҳиллиги туфайли “Бунёдкор” ва “Пахтакор” дек жамоаларга устимиздан ғалаба қозонишларига имкон бермадик.

–“Насаф”га қарши ўйин қандай бўлади?

-Бу футбол, агар сен ўзингни профессионал деб, ҳисобласанг буни майдонда исботлашинг керак, майдонга биз ютқазиб берамиз деб, чиқмаймиз ҳар битта рақибга қарши жиддий тайёргарлик кўрамиз. “Насаф” ҳам кучли жамоа, тайёргарлигимиз ҳам шунга яраша бўлади. Футболда ҳар нарса ва кутилмаган натижалар бўлиб туради, мана ким ўйлаганди “Бухоро” Қаршида ўйнаб, “Насаф”дан очко олиб кетади деб. Воқеани ўзингиз кўриб турибсиз. Биз сюрпризга эмас жиддий ўйинга тайёрланамиз. Яна бир мисол, “Машъал” сафарда “Олмалиқ”дан муҳим очкони тортиб олди. Демак, қайси жамоа ўйинга жиддий ва кўпроқ тайёргарлик кўрса, натижа ҳам шунга яраша бўлади. Ўйлайманки, навбатдаги учрашувимиз ҳам бундан мустасно эмас.

–Суҳбат учун раҳмат!

Фахриддин ЧОРИЕВ суҳбатлашди