Қозон мэри Илсур Метшин “Рубин” футбол жамоаси президенти бўлди. 4 сентябрда Татаристон президенти Рустам Минниханов раислигида “Рубин” васийлик кенгашининг йиғилиши бўлиб ўтди ва унда “Рубин”га 2012 йилдан бери президентлик қилиб келаётган Валерий Сорокиннинг истеъфоси қабул қилинди. Сорокин ўз лавозимига Қозон мэри Илсур Метшин номзодини тавсия қилди.

Метшин бир овоздан “Рубин”нинг янги президенти этиб сайланди. “Васийлик кенгаши Валерий Сорокинга “Рубин” футбол клуби президенти лавозимида амалга оширган жиддий иши, айниқса молиявий интизом ва молиявий оқимларнинг очиқ-ойдилигини ошириш борасидаги саъй-ҳаракатлари учун катта миннатдорчилик билдиради”, дейилмоқда хабарда.

Янги президентга қозонликлар бош мураббийи Ринат Билялетдинов билан шартномани бекор қилиш вазифаси топширилди. 31 август куни Минниханов жамоа ўйинининг паст даражаси туфайли Сорокин ва Билялетдиновга ўз лавозимларини ихтиёрий равишда тарк этишни таклиф қилган эди.

Россия чемпионатининг 7 туридан кейин “Рубин” ўз ҳисобида бор-йўғи 3 очко жамғарган ҳолда мусобақа жадвалининг охиридан битта олдинги 15-ўринни эгаллаб турибди.