Сиз ушбу мақола орқали футбол оламида содир бўлган қизиқарли воқеалардан хабардор бўласиз.
ЎЗАРО ИШОНЧ — ҒАЛАБА ОМИЛИ
60-йиллар охирида Австралиянинг «Нокпорт» клуби футболчилари жамоага янги тимсол танлашди. Бу тимсол кенгуру эди ва улар битта кенгуру ҳам сотиб олишди. Жонивор эса ҳар ўйинда, ҳамма ерда жамоа билан бирга бўлгани учун футболчиларга шу қадар ўрганиб қолдики, ҳатто уларнинг баъзи майда-чуйда нарсаларини халтачасида олиб юришга ҳам қаршилик кўрсатмасди. Бир ўйиндан сўнг кенгурунинг халтачасидан 4 та паспорт, бир қанча пул ва … пиводан бўшаган 4 та шиша топишди. Қитмир ишқибозлар кенгурунинг ишонувчанлигидан фойдаланишган экан.
ҚИММАТГА ТУШГАН ЎЙИН
Мадриднинг «Реал» клубининг содиқ ва вафодор мухлиси Феликс Гаэль жамоасининг навбатдаги учрашувига чипта топа олмай ҳалак эди. Боз устига Қироллик клубининг «Атлетик» (Бильбао) жамоасига қарши ўйини анча қизиқарли ўтиши кутилаётганди. Хуноби ошиб турган Феликснинг ўйин бошланишига саноқли дақиқалар қолганида омади чопиб қолди. Қай бир мухлис унинг ҳолига раҳми келибми, чиптасини беришга рози бўлди. Шодлигидан терисига сиғмай кетган Феликс эса ўша мухлисга ўзининг лотерея чиптасини совға қилиб юборди. Аммо орадан бир неча кун ўтгач, маълум бўлдики, айнан ўша лотерея чиптасига 300 минг песет ютуқ чиқибди. Аммо Га-эль бу хабарни мардонавор қабул қилди: «Шубҳасиз, бу ҳаётимдаги энг қиммат ўйин бўлди», — деди у қатъият билан.
ХЎП БЎЛАДИ, СЭР!
Чилининг Антофагасте шаҳрида бўлиб ўтган футбол ўйинида ажабтовур воқеа юз берди. Шаҳар ҳокимияти ва маҳаллий офицерлар терма командалари ўзаро куч синашишаётганди. Ўйин пайтида ҳакам офицерлар дарвозасига томон пенальти белгилади. Шунда ўша антиқа ҳолат юз берди — жазоланган жамоа ўйинчиларидан бири югуриб келиб, ҳакамга қўли билан майдон ташқарисини кўрсатди ва уни ўйиндан четлатди. Ҳакам эса индамай майдонни тарк этди. Маълум бўлишича ҳакамни ҳайдаган футболчи лейтенант бўлиб, унвон бўйича унтер-офицер бўлган ҳакамдан баланд экан. Хизматчилик буёғи!
УЗО-О-О-О-ОҚ ДАВОМ ЭТДИ…
Футбол тарихидаги энг узоқ давом этган ўйин 1981 йилнинг 1-3 августларида бўлиб ўтган. Ирландиянинг «Каллинаферси» клубининг икки жамоаси (ўринбосарлар ва ўсмирлар жамоалари) нақ 65 соату 1 дақиқа давомида майдонда тер тўкишган.
ОДИЛ ҲАКАМ
Дунёдаги энг адолатли ҳакам англиялик футбол арбитри Мелвин Силвестр-дир. Бир футбол ўйини пайтида Ричард Керд исмли ҳужумчи қаҳрамонимизни бир неча маротаба тепиб, туртиб ўтади. Охири Мелвиннинг асаблари чидамайди ва Кердни учта зарба (хук ва апперкот) билан чимга ағанатади. Энг ҳайратланарлиси шунда содир бўлди — Мелвин қилғилиғи учун ўзига қизил карточка кўрсатди ва майдонни тарк этди.
ЛОЛАРАНГ ТОБУТЛАР
2000 йилги Европа чемпионати Нидерландия ва Бельгия давлатлари яшил майдонларида ўтганидан хабарингиз бўлса керак (агар 2001 йилда туғилмаган бўлсангиз албатта). Ўша чемпионат бошланишидан аввал голландиялик бир ишбилармон лоларанг… тобутларни ишлаб чиқаришни йўлга қўйди. «Тушунаман, тобут яхши нарса эмас. Унга кўзи тушган одамнинг кўнгли хира бўлади. Аммо у миллий терма жамоамизнинг рангларига бурканган. Умид қиламан, биронта экземпляр сотилмай қолмайди», — деди уддабурон тадбиркор.
СИЗДАН УГИНА…
1983 йилнинг 21 декабрь санасида Европа чемпионатлари тарихи-даги энг шов-шувли ўйинлардан бири бўлиб ўтган. Саралаш баҳсларининг аутсайдерларидан бири бўлмиш Мальта терма жамоаси Ев-ропа ва жаҳон грандларидан бири бўлмиш Испания терма жамоаси билан учрашди. Гуруҳда биринчи ўринни эгал-лаб турган Голландия терма жамосидан ўзиб кетиб, ҳал қилувчи босқичга тўғридан-тўғри йўлланма олиш учун испанлар мальталикларни 11 тўп фарқи билан мағлуб этишлари керак эди. Худди шундай ҳам бўлди — 12:1 ҳисоби футбол жамоатчилигига бомба мисоли таъсир қилди. Голландлар ўйин сотилганлиги ҳақида бонг ура бошлашди. УЕФА корчалонлари ўйиннинг видеоёзувини обдон томоша қилиб, вазиятларни ипидан игнасигача таҳпил қилишди. Аммо ҳеч қандай қинғирликнинг ҳиди келмаётганини эътироф этишди. Айтишларича ўша йили Мальта терма жамоаси футболчилари Янги йил байрамини дунёнинг элита курортларидан бирида кутиб олишган эмиш.
АНА СИЗГА ТИФФОЗИ!
1986 йилда Милан шаҳри клиникаларидан бирига Роберто Паолини исмли мижоз келтирилди. Унинг оёғи синган эди. Роберто севимли жамоаси бўлмиш «Интер»нинг гол урганини эшитиб, ўзини иккинчи қаватдан пастга ташлабди. Телба тиффози оёғининг синганлигидан заррача афсус чекмас, оғзи кулоғида эди. Аммо орадан кўп ўтмай бу фанатнинг хурсандчилиги ниҳоясига етди. Санитарлар олиб келган хабарга кўра, «Интер» ўз дарвозасига тўп киритиб қўйган эмиш. Ушланглар анави қизни…
Мақолани тайёрлашда Чемпион газетасининг 2009 йил 32 сонидан фойдаланилди.
