Яқинда Руни Англия терма жамоасида Бобби Чарлтон рекордини янгилаганидан хабарингиз бор. Биз сизларга терма жамоаларнинг амалдаги 10та энг яхши тўпурарларини тақдим этамиз.

10. Луис Суарес – 43та гол (Уругвай – 82та ўйин)

Рекорд ўзига тегишли.

Уругвай терма жамоасининг порлоқ марказий ҳужумчиси 7 йил ичида халқаро ареналарда 40 тадан ортиқ гол киритди. Дигео Форлан 80 йил турган Эктор Скаронени рекордини янгилаган эди, лекин унинг ҳам рекорди узоқ сақланиб турмади. “Барселона” ҳужумчиси Форланнинг рекордини урди, бунинг учун унга Диегога нисбатан кам ўйин ва вақт кетказди. Агар Суарес рақибларини камроқ тишлаб турса, ўзининг рекордини оширишга унда вақт етарли.

9. Синдзи Окадзаки – 45та гол (Япония – 95та ўйин)

Рекорд – Кунишиге Камамото (80та гол – 84та ўйин)

29 ёшли ҳужумчи “Лестер”да ушбу мавсумни жуда яхши бошлади. Окадзаки клуб миқёсидаги ютуқлари билан унчалик мақтана олмайди. Терма жамоада эса бошқа гап. Синдзи терма жамоада ҳудди Суарес каби мунтазам гол уриб келмоқда. Лекин японларнинг афсонавий футболчиси, Олимпия ўйинлари тарихидаги энг яхши тўпурари Камамотани рекордини янгилаш анча мушкул иш.

8. Неймар – 46та гол (Бразилия – 67та учрашув)

Рекорд – Пеле (77та гол – 92та ўйин)

Ушбу рўйхатимиздаги энг ёш тупурар. 23 ёшли Неймар терма жамоада деярли элликта гол уриб қўйди. Неймардан олдинда афсонавий Зико, Ромарио ва Роналдолар турибди. Агар Неймар шу суратда давом этса 5 йиллардан сўнг янги рекордчига айланиши мумкин. Пеле иккинчи ўринда –  ғаройиб бўлса керак.

7. Лукас Подольски – 48та гол (Германия – 126та ўйин)

Рекорд – Мирослав Клозе (71та гол – 137та ўйин)

Барча Германия терма жамоалар мураббийининг севимлиси. Подольскининг клублар миқёсидаги муваффақиятсизлигига қарамасдан бу нарса терма жамоадаги фаолиятига ҳеч ҳам таъсир қилмайди. Ҳозир у Туркияда тўп суришига қарамай терма жамоага мунтазам чақирилиб келинмоқда. Лекин Подольски Герд Мюллерни рекордини янгилаган Клозега етиб олиши анча қийин иш.

5-6. Лионель Месси – 49та гол (Аргентина – 105та ўйин)

Рекорд – Габриэль Батистута(56та гол – 78та ўйин)

Месси Аргентина либосида “Барселона”да ўйнагандек ўйин кўрсата олмайди. Аргентина терма жамоаси сардори 49та гол киритган ва Батистутани рекордига анча яқинлашиб олди. Бу кетишда Месси Габриэлнинг рекордини янгилашига ҳам ишонсак бўлади. Лекин ўйинлар нисбатига қарасак Мессининг кўрсаткичи БатиГолнинг кўрсаткичидан анча кам.

 5-6. Робин ван Перси – 49та гол (Голландия – 99та ўйин)

Рекорд ўзига тегишли

Голландиялик голеадорнинг терма жамоадан кетиш вақти келгандек. Буни сўнги ўйинларда майдонга кам тушаётганидан ҳам англашимиз мумкин. Лекин Робин аллақачон Голландия футболи тарихига ўз номини ёздириб қўйди. Унинг мундиалда Касильяс дарвозасига урган голини анча вақтгачам эслаб юришади. Унинг ҳозирги рекорди ҳам узоқ сақланиб турса керак.

4. Уэйн Руни – 50та гол (Англия – 107та ўйин)

Рекорд ўзига тегишли

Замонамизнинг етарлича баҳоланмаган футболчиси Руни бирнеча кун аввал ярим асрдан ортиқ сақланган Бобби Чарльтон рекордини янгилади. Бундан 10 йил аввал у 19 ёшида Англия терма жамоасида биринчи голини урган эди. Ҳали Рунида ўз рекордини мустаҳкамлашга вақт этарли.

3. Криштиану Роналду – 55та гол (Португалия – 122та ўйин)

Рекорд ўзига тегишли.

Роналду Паулетини рекордини янгилаганига анча вақт бўлди ва ҳалигачам унинг Португалия терма жамоасида бирор соврин ютишига умиди сўнгани йўқ. Терма жамоада унга яхши шерик етишмаётгандек. Ўз рекордини эса ҳали анча яхшилаб олиши аниқ.

2. Златан Ибрагимович – 57та гол (Швеция – 107та ўйин)

Рекорд ўзига тегишли

Такрорланмас Златан бир йил аввал 82 йил сақланган Свен Рюделль рекордини янгилади. Унинг жуда кўп голлари такрорланмаслиги билан ажралиб туради. Ибрагимович урган голлар YouTube порталининг видеоларини безаб келмоқда.

1. Робби Кин – 67та гол (Ирландия – 142та ўйин)

Рекорд ўзига тегишли

Роберт Дэвид Кин бир ҳафта аввал терма жамоа сафида Гибралтар дарвозасига иккита гол урди. Кин “Яшил армия”ни ҳеч ҳам тарк этмайдигандек кўринади. Робби Ирландия терма жамоасида дебют қилганига 18 йил бўлди. Менимча у терма жамоада 70та гол ва 150та учурашув ўтказмагунча тарк этмайди.