Пайшанба ва жума кунги машғулотларни умумий гуруҳдан четда ўтказган Роман Широков майдонга чиқиши борасида шубҳага борганини таъкидлади.
- Ўйин бошланишига тобора оз фурсат қолаётган бир паллада таркибдан жой олишим шубҳа остида эди, аммо шифокорларнинг саъй-ҳаракатлари туфайли тайёр ҳолга келдим, - деди ўйиннинг 83-дақиқасида алмаштирилган Широков. - Хайрият, аввал рақибни сиқувга олдик, кейин эса ташаббусга эга бўлдик.
- Тоза голингизни инобатга олишмаганидан ачинмадингизми?
- Ўша гол чиндан ҳам тўғри ҳолатда урилган бўлса, албатта, бу кишини хафа қилади. Анчадан буён тўп киритмаяпман, дарвозани ишғол қилишни жуда хоҳлагандим. Ўз навбатида, Дзагоевнинг ажойиб пасини эътироф этиш жоиз. Ўша вазиятда ҳимоячилардан анча ортда эдим. Ён чизиқ ҳаками офсайдни қаердан ўйлаб топди, билмайман.
- Ўйин якуни хавотирли кечдими?
- Тўпни иложи борича майдоннинг рақиб жойлашган қисмида ушлашга интилдик. Аммо буни уддалаш осон кечмади. Шу ўринда иккита қулай вазиятни вужудга келтирганимизни ҳам алоҳида таъкидлаш лозим.
- Кийиниш хонасида Игорь Акинфеевга нима дедингиз?
- Унга ташаккур билдирдик. Игорь сўнгги пайтларда бизни тез-тез қутқармоқда.
- Сизнингча, Россия терма жамоасининг бугунги ўйини аввалгиларидан нимаси билан фарқланади?
- Ҳиссиётлар жунбушга келди. Қолаверса, ишқибозлар ҳам бизни бутун баҳс давомида тинмай қўллаб туришди. Менимча, айнан уларнинг мададлари якуний паллаларда рақиб ҳужумини бартараф этишимизга замин яратди.
- Смольников товонингиз билан пас беришингизни сезганмиди ёки ҳаммаси тасодифан рўй бердими?
- Буни аввалдан пайқаган кўринади. Ҳар ҳолда, у билан бирга ўйнаганмиз.
- Гуруҳда ҳеч бўлмаса иккинчи ўрин қўлга киритилишига ишонасизми?
- Албатта. Ахир майдонга шу мақсадда чиқяпмиз-ку. Кейинги уч ўйинни ҳам ўз фойдамизга ҳал қилишимиз шарт. Шундан сўнг гуруҳда қандай вазият вужудга келишини билиб оламиз.
