Жорий йилнинг 18-20 сентябрь кунлари Тошкентдаги Республика олимпия захиралари коллежининг теннис кортида теннис бўйича Дэвис Кубоги доирасидаги Ўзбекистон ва АҚШ терма жамоалари ўртасидаги учрашув бўлиб ўтади. Бу ҳақда Ўзбекистон теннис федерацияси матбуот хизмати хабар тарқатди.

Бу Ўзбекистон терма жамоаси учун жамоавий баҳслардаги жаҳон чемпионатининг олий лигасига чиқиш учун саккизинчи уриниш бўлади. Бунга қадар ўзбекистонлик теннисчилар юқори лигага йўлланма олиш учун икки марта австралияликлар билан (1998, 2014), шунингдек бир мартадан Чехия (1999), Нидерландия (2000), Сербия (2009), Испания (2001) ва Қозоғистон (2012) терма жамоаларига қарши кураш олиб боришган.

Жамоа сардори Пётр Лебед бошчилигидаги Ўзбекистон терма жамоаси таркиби Денис Истомин, Фаррух Дўстов ҳамда 20 ёшли Темур Исмоилов ва 21 ёшли Санжар Файзиевдан иборат.

АҚШ терма жамоаси мазкур босқичга етиб келгунига қадар Буюк Британия теннисчиларидан устун келишганди. Жамоа сардори Жим Курье жамоа таркибида баъзи ўзгаришларни амалга оширган. Жон Изнер ўрнига биринчи ракетка сифатида Жэк Сок қатнашади. АТР рейтингида 24-ўринда бораётган спортчи жуфтлик баҳсларида ҳам кортга чиқади. Шунингдек таркибда Стив Жонсон (47-ўрин) ҳам дебют қилади. Таркибдаги ўрнини Сэм Куэрри (38) ва Дональд Янг (68) сақлаб қолган. Энг кутилмаган ҳолат эса жуфтлик баҳсларида дунё рейтингини бошқариб турган ака-ука Брайнлар Тошкентдаги босқичда иштирок этишмайди.