Ўзбекистон олимпия терма жамоаси катта мураббийи Дилшод Нуралиев кеча "Спорт" канали орқали эфирга узатилган "Футбол шарҳи" меҳмони бўлди ва миллий терма жамоамизнинг Филиппинга қарши ўйини ҳақида ўз фикрларини билдириб ўтди.

"Миллий терма жамоамиз Филиппинга қарши баҳс ўтказаётганида Олимпия терма жамоаси Словакияда Саудия Арабистонига қарши ўртоқлик учрашувида майдонга тушганди. Шу боис ўйинни тўғридан-тўғри кўра олмадим. Кейинчалик ўйиндаги вазиятларни томоша қилдим. Шуни таъкидлашим лозимки, терма жамоада янги мураббийлар штаби иш бошлаганидан кейин жамоанинг ўйинида тартиб юзага келганди. Нафақат ўйинда, балки майдондан ташқарида ҳам тартиб-интизом жойига келтирилди. Бу эса ўз натижасини бера бошлади", - дейди Нуралиев.

Дилшод Нуралиев, шунингдек, Ўзбекистон миллий терма жамоасининг ЖЧ-2018 саралашининг мазкур гуруҳ босқичидаги имкониятлари ҳақида қисқа вуа лўнда ўз фикрини билдирди.

"Кўп гапириб ўтирмайман. Терма жамоамиз ушбу гуруҳ босқичидан ўтади. Бундан хавотир олмасак ҳам бўлади", - дейди Ўзбекистон U23 катта мураббийи.