Португалия терма жамоаси собиқ ярим ҳимоячиси Луиш Фигу “Реал” ҳамда “Барселона” етакчилари Криштиану Роналду ва Лионель Мессини ўзаро таққосламаслик кераклигини таъкидлади.
Иккала испан грандида ҳам тўп сурган собиқ футболчининг сўзларига кўра, мухлислар ва мутахассислар уларни ўзаро солиштирмасликлари ва аксинча икки юлдузнинг ўйинларидан эстетик завқ олишлари лозим.
– Криштиану Роналду ва Мессидан бирини танлаш, оқ трюфель ва қизил икрадан бирини танлашдек гап, – дея Фигу сўзларини келтиради Football Espana хабарига асосланиб “СЭ”. – Бу икки юлдузни таққослаш нотўғри. Улар орасидаги фарқни фақат уларнинг жисмоний ҳолатларидан билиш мумкин. Биз уларни бир-бирига солиштирмаслигимиз ва аксинча бу икки ўйинчининг ҳаракатларидан завқланишимиз керак. “Олтин тўп – 2015”? Бу сафарги соврин учун баҳс ҳам аввалгиларидек ўтади ва кураш Криштиану Роналду ҳамда Месси ўртасида боради.
