Бизнингча, унинг голи тасодифан юз бермади. Мартиаль ажойиб ҳаракатлари билан АПЛга мос футболчи эканлигини исботлади. Луи Ван Гаал «Ливерпуль» устидан қозонилган ғалабадан сўнг ўтказилган матбуот анжуманида кайфияти яхши ҳолатда франциялик ўсмир ҳақида ижобий фикрларини билдириб ўтди. Бир соат аввал эса Антони чап қанотда тўпни ўзига бўйсундириб, АПЛнинг энг тажрибали ҳимоячиларидан бири-Мартин Шкртелни алдаб ўтганча уни Симон Миньоле қўриқлаётган дарвоза бурчагига киритди ва шу гол билан ўйин тақдирини ҳал қилди. Гол киритилган лаҳзада шарҳловчилар АПЛга янги Тьерри Анри ташриф буюрганини таъкидлашди.
Бир ҳафта аввал спорт оламида кутилмаган ҳодиса юз берди. «Манчестер Юнайтед» Франция терма жамоасида бир мартагина бўлса ҳам майдонга тушмаган 19 ёшли ўсмир учун 50 миллион евро сарфлашди (30 млн. евро бонус). Бу нарх футбол тарихида 20 ёшга етмаган ўйинчилар орасида рекорд ҳисобланади. Англияда Мартиал ҳақида Франция футболига қизиқадиган ишқибозлар бир озгина хабардор бўлишлари мумкин эди. Антони трансферига сарфланган сумма сўнгги хафтанинг оламшумул воқелигидан бири бўлганди.
Ҳатто, Уэйн Руни бундай футболчи ҳақида ҳеч қандай маълумот билмаслигини очиқчасига тан олди ва жамоадоши Морган Шнайдерлиндан мазкур футболчи ҳақида батафсил сўраб-суриштирди. Умуман олганда, трансфер амалга ошишини кузатганлар биринчи навбатда Луи Ван Гаални ноўрин айблашиб, бир йил муқаддам Ди Мария трансферини эсга олишди. Анхел ва омадсиз Фалькао бир йилдан сўнг «Олд Траффорд»ни тарк этишганди.
Бироқ, голландиялик мутахассис трансфер бозорида клубга керак бўлган ҳужумчи қидириб бироз ўйга толди ва охири «Монако»нинг ёш футболчисини сотиб олишга қарор қилди. «МЮ» клубга фойдали ва узоқ йиллар давомида тўп сурадиган футболчи излашни ўз олдига мақсад қилди.
Робин ван Перси ва Хавьер Эрнандесларнинг кетганидан кейин жамоада фақатгина бир ҳужумчи -Уэйн Руни қолганди. Трансфер ойнаси якунланишига қадар кўпгина миш-мишлар тарқади. Баъзан, Томас Мюллер, гоҳида Эдинсон Кавани ва ҳатто, Неймарга ҳам кўз сузиб кўришди. Лекин, «қизил иблислар» мазкур ҳужумчилар билан келишувга эриша олишмагач, ўтган мавсум ўзини ижобий томондан кўрсата олган ёш юлдузга эътиборларини қаратишди.
Манкунианликлар тўлашган сумма «Ливерпуль» дарвозасига киритилган голдан кейин ўзини бир озгина оқлади. Агар трансфер бозори ўрталари бўлганида Мартиални 20 ёки 30 миллион еврога сотиб олиш мумкин эди, лекин қайси клуб ўз етакчисидан айрилгиси келади?
Иккинчидан, АПЛда амалга оширилган трансферлар рўйхатига юзлансак, унда футболчилар нархи хаддан зиёд ошиб кетганига гувоҳ бўламиз. Масалан, «Ливерпуль» унчалик машхур бўлмаган Роберто Фирминьо ва Кристиан Бентеке учун 90 миллион евро сарфлади. «Манчестер Сити» эса аввалида Рахим Стерлингни 60 млн.га, кейинчалик Кевин Де Брюйнени 75 млн. еврога харид қилди. Замонавий футбол қоидаси шуни талаб этадики, қайси бир футболчи омма эътиборида бўлса унинг нархи жамоани умуман қизиқтирмайди. Шу ўринда такидлаш лозимки, Англия клублари йил бошидан Sky Sport телеканалига трансляция ҳуқуқларини пуллаган ҳолда ғазналарини етарлича тўлдириб олишгани боис кўнгиллари истаган футболчини ўз жамоалари либосида майдонга тушишларини хоҳлаб қолишди.
Ниҳоят, учинчи сабаб - Антонининг икки йил давомида иштирок этган ўйинларида киритган голлари сони 15тани ташкил этади. Кўриниб турибдики, Мартиалдатакрорланмас истеъдод мавжуд. Техника, тезлик, нозик характер ва ҳаракатлари билан у Тьерри Анрини эслатиб юборади. 19 ёшли форвард ўзига шунчалик ишонадики, худди 10 йилдан бери катта футболда юқори савияли ўйинчи каби тўп сураётгандек. «МЮ» скаутлари узоқ вақтдан бери Мартиални кузатиб келишарди. Агарда ўсмирга тўғри йўл кўрсатилса, келажакда ундан жаҳон футбол талабига мос келувчи юлдуз кашф этиш мумкин.
