Миланнинг «Интер» клуби марказий ҳимоячиси Алессандро Бастони «Барселона»га ўтиш имкониятини кўриб чиқиши мумкин.

Сўнгги ойларда Каталония гранди италиялик футболчига жиддий қизиқиш билдираётгани ҳақида хабарлар кўпайди. Журналист Адриан Санчеснинг маълум қилишича, 26 ёшли футболчи «Интер» билан амалдаги шартномасини узайтиришдан олдин «кўк-анорранглилар»нинг нияти қанчалик жиддий эканини билишни истамоқда.

Алессандро Бастонининг «Интер» билан амалдаги меҳнат шартномаси 2028 йилнинг ўрталарига қадар мўлжалланган. «Нерадзурри» раҳбарияти эса марказий ҳимоячи билан янги келишув имзолаш ниятида.

Эслатиб ўтамиз, сешанба куни «Интер» Чемпионлар лигаси плей-офф босқичида Норвегиянинг «Будё-Глимт» жамоасига икки ўйин натижасига кўра 2:5 ҳисобида имкониятни бой бериб, мусобақани тарк этди.