Ўзбекистон чемпионатидаги кичик танаффусдан фойдаланган аёллар жамоалари мамлакат кубогининг плей-офф сериясидаги ўйинларини ўтказишди. Бошқалардан олдинроқда кетаётган Бекободнинг “Металлург” жамоаси қизлари чорак финал босқичида пойтахнинг “Локомотив” жамоасини ҳар иккала учрашувда йирик ҳисобда доғда қолдирди. Дастлабки учравшув Бекобод шаҳрида ўтказилиб, унда пойтахт вилояти жамоаси рақибалари дарвозасига жавобсиз 14(!!!) та гол киритишди. Бу мавсум қайд этилган энг йирик ҳисоб саналади. Мазкур учрашувда бекободликлардан 3 нафар ўйинчи хет-трикни расмийлаштирган бўлса, яна беш футболчи ўз ҳисобларига биттадан гол ёзиб қўйишди. Тошкентда бўлиб ўтган жавоб учрашувида эса бекободликлар 8:1 ҳисобида зафар қучишди. Энди пойтахт вилояти жамоаси қизлари ярим финалда куч синашадиган рақибалирини кутишади. Уларнинг рақибалари номи “Андижанка” – “Бунёдкор” жамоалари тўқнашувида аниқланади. Иккинчи ярим финалда эса Навоийнинг “Гули” жамоаси “Севинч” – “Машъал” жамоалари ўйинининг ғолибасига қарши майдонга чиқади. ¼финал, дастлабки ўйин.  15 сентябрь: "Металлург" - "Локомотив" - 14:0 (Дилдора Нозимова-3, Людмила Карачик-3, Моҳигул Икромова-3, Мавлуда Мунавварова, Юлдуз Набиева, Нозима Камолтоева, Наргиза Абдурасулова, Лутфинисо Ҳамидова) Жавоб учрашуви, 17 сентябр:   "Локомотив" - "Металлург" - 1:8(Зарина Бобоева – Лутфинисо Ҳамидова-3, Людмила Карачик-3, Моҳигул Икромова, Дилдора Нозимова).