Мамлакатимизнинг биринчи рақамли теннисчиси Денис Истомин Россиянинг Санкт-Петербург шаҳрида давом этаётган мукофот жамғармаси 1 миллион 30 минг долларни ташкил қилувчи турнирнинг яккалик баҳсларидаги иштирокини ҳам ғалаба билан бошлади.

Ҳамюртимиз ҳозиргина якунига етган учрашувда қозоғистонлик Михаил Кукушкинни мағлубиятга учратди. Илк сет ғолиби тай-брекда аниқланди. Унда Истомин зафар қучди. Теннисчимиз иккинчи сетни 2:6 ҳисобида бой берди. Лекин ҳал қилувчи учинчи сетда Денис айнан 6:2 ҳисоби билан рақибини доғда қолдирди.

Турнирда 8-рақам остида таснифланган Кукушкинни 7:6, 2:6, 6:2 ҳисобида мағлуб этган Истоминнинг иккинчи даврадаги рақиби айни дақиқаларда давом этаётган германиялик Бенжамин Беккер ҳамда қозоғистонлик Андрей Голубев учрашувидан сўнг аниқланади.

Эслатиб ўтамиз, Кукушкин дунё рейтингида 48-поғонадан жой олган бўлса, Денис Истомин 62-ўринни эгаллаб турибди.