Чемпионлар лигасининг "F" гуруҳида иккинчи турда Мюнхенда "Бавария" Загребнинг "Динамо"сини қабул қилади.
Ушбу клублар бугун ўз тарихларида илк бора рақиб бўлишади.
Загребликлар Чемпионлар лигасида бешинчи марта иштирок этишмоқда. "Динамо" ўтган турда кутилмаганда "Арсенал" устидан зафар қучиб, Чемпионлар лигасидаги 15 та ғалабасиз сериясига чек қўйган эди. "Динамо" ЧЛда "Арсенал"дан ташқари "Аякс”, "Порту" ва "Штурм" каби клубларни ҳам мағлуб этган.
Маълумот учун "Динамо" 10 йилдан бери Хорватия чемпионлигини бегона қилмай келмоқда. Загреб суперклуби умумий ҳисобда 17 карра мамлакат чемпиони ҳисобланишади.
"Бавария" эса 5 карра чемпионлар лигаси ғолиби саналади.
Бугунги баҳсда шубҳасиз Мюнхенликлар фаворит. Левандовский етакчилигидаги "Бавария" ҳужумчиларини меҳмонлар тўхтатиб қола билишармикан? Бу саволга бир неча соатлардан сўнг жавоб топамиз.
