Олий лига 24-тур учрашувлари доирасидан ўрин олган “Локомотив” – “Олмалиқ” учрашувидан кейин ҳар икки жамоа устозлари иштирокида матбуот анжумани ўтказилди.

Дастлаб меҳмон жамоа бош мураббийи Игорь Шквирин журналистларнинг саволларига жавоб берди.

– Бугунги ўйиндаги ғалаба билан “Локомотив”ни табриклайман. Мезбонлар биздан бир калла устун эканликларини кўрсата олишди. Улар бизни ҳар жиҳатдан ортда қолдиришди. Ўзи охирги пайтларда бизга барқарорлик етишмаяпти. Бугун ҳам оптимал таркиб билан ўйнай олмадик. Бир қатор ўйинчиларимиз майдонга туша олишмади. Яхши кунлар келишига умид қилишдан бошқа чорамиз йўқ. Бугунги баҳсда “қанотларимиз” унча яхши ишламади. Ҳужумчига керакли пасни етказиб бериш борасида муаммоларимиз бор экани кўзга ташланди. Қолаверса, гол ўтказиб юборгандан сўнг таваккал қилишни истамадик. Чунки 4та эмас, балки 6та гол ўтказиб юборишимиз ҳам мумкин эди, – деди тажрибали мутахассис.