"Локомотив" ва "Олмалиқ" жамоалари ўртасидаги ўйиндан кейин ташкил этилган матбуот анжуманининг иккинчи қисмида Вадим Абрамов иштирок этди.

— Натижадан қаноат ҳосил қилган бўлсам-да, ўйин савияси менга ёқмади. Биз бундан яхшироқ ўйнашимиз керак. Бугун ҳаддан ташқари кўп хатога йўл қўйдик. "Олмалиқ" ўйинимизни яхши ўрганган шекилли, майдон марказ эркин ўйнаш имкониятини бермади.

— Бир неча турлардан бери жамоангиз ўйинидан қониқмаётганингизни айтиб келяпсиз. "Локомотив"нинг ҳар бир ўйинда юқори савияда ўйин кўрсатишига нима халал бермоқда.
— Ҳар бир ўйин турлича бўлади. Масалан, "Бунёдкор"га қарши яхши ўйнагандик. Бугун эса "Олмалиқ" бизни кўп хато қилишга мажбур қилди. Ҳар бир жамоа рақиби имкон берганчалик ўйнайди.

— Бугун марказий ҳужумчилар очиқ ҳудудларга очилиб, тўп сўраган бўлсалар-да, марказ бўйлаб кесма узатмалар бўлмади. Жамоа фақат қанотга таяниб ўйнади...
— Барчаси футболчиларга боғлиқ. Таркибимизда Фабрегас бўлганида эди, сиз айтгандек узатмаларни берган бўларди. Билмадим, бизнинг футболчилар бундай узатма бериш орқали хато қилишдан қўрқишса керак. Жамоа тўғри ўйнаса, хатолар кам бўлади.