Тошкентда старт олган дзюдо бўйича Гран-при турнирининг дастлабки кун беллашувлари ўз ниҳоясига етди.
Биринчи кундан сўнг Ўзбекистон терма жамоаси вакиллари 2та медални қўлга киритишди. Ҳар икки медаль ҳам 60 килограммгача бўлган полвонлар томонидан олинди.
Шарофиддин Лутфуллаев финалда япониялик Юма Ошима билан баҳс олиб бориб, муддатидан аввал мағлубиятга учради. Диёрбек Ўрозбоев эса бронза медали учун туркиялик Бекир Ўзлу билан баҳс олиб бориши керак эди. Аммо турк дзюдочиси жароҳати сабаб беллашувдан бош тортди ва Ўрозбоев жангсиз ғалаба қилди.
Биринчи кун якунидан сўнг медаллар жамғариш бўйича Ўзбекистон вакиллари умумжамоа ҳисобида еттинчи ўринни банд этишди. Япония терма жамоаси 60 ва 66 килограмм вазн тоифасида иштирок этган спортчиларнинг муваффақиятидан кейин 2та олтин медаль билан якка пешқадам бўлиб туришибди.
