Пойтахтимиздаги “Ўзбекистон” спорт саройида дзюдо кураши бўйича ўтказилаётган Гран-При турнирида вазни -73 кг.бўлган полвонлар беллашувида ғолиб ва совриндорлар номи маълум бўлди.    Эътиборлиси, ушбу вазн тоифасида олтин медални ҳамюртимиз Мирали Шарипов қўлга киритди. Терма жамоамизнинг етакчи спортчиларидан бири ҳисобланган Мирали Шарипов саралаш беллашувларида Беларус, Ж.Корея ва Германия терма жамоаси аъзоларини мағлуб этиб, ярим финалда КХДР вакилини, ҳал қилувчи финал баҳсида эса португалиялик Нуно Сараивани енгди.    Ушбу вазн тоифасида беллашувларга киришган яна бир юртдошимиз Ғиёсжон Бобоев эса саралаш босқичида Сербия, Хитой ва БАА вакилларидан устун келди ва ярим финалда португалиялик Нуно Сараивага имкониятни бой берди. Учинчи ўрин учун кечган баҳсда германиялик Игор Ванткени енгган Ғиёсжон Бобоев бронза медали соҳиби бўлди.    Айни пайтга келиб терма жамоамиз ҳисобида 1 та олтин, 1 та кумуш ва 2 та бронза медали мавжуд бўлиб, ҳозирча ҳамюртларимиз умумжамоа ҳисобида дзюдо ватани вакиллари японияликлардан кейин иккинчи ўринда боришмоқда.  

Шавкат Жалилов