Англия чемпионатининг 8-тури доирасида "Арсенал" ўз майдонида "Манчестер Юнайтед"ни қабул қилди ва пешқадам устидан йирик ҳисобда ғалаба қозонди.

Учрашувнинг дастлабки 20 дақиқаси манкунианликлар учун даҳшатли туш каби бўлди. "Канонирлар" бирин-кетин учта тўпни меҳмонлар дарвозасига "қоплаб" қўйишди. Баҳснинг 6-дақиқасида Ўзил жарима майдончасининг ўнг томонидан дарвоза яқинига узатма берди ва Алексис Санчес товони билан дарвозани ишғол қилди. Ҳимоячи ва Де Хеа чилилик футболчидан бундай ҳаракатни кутишмаганди.

"МЮ" майдон марказидан тўпни ўйинга киритганидан кейин майдон эгалари тўпни эгаллаб олишди ва манчестерликлар дарвозасини иккинчи марта ишғол қилишди. Ўзил ўзи бошлаган ҳужумни ўзи якунига етказди. Уолкотт германиялик футболчидан узатмани қабул қилганидан кейин жарима майдончаси ичида бир ҳимоячини алдаб, Месутга узатма берди. Ўзилнинг 12 метрлардан йўллаган зарбаси олдида Давид де Хеа ожиз қолди.

Луи ван Гал шогирдлари нима бўлаётганини англаб, ҳали ўзларига келиб улгурмасидан аввал Санчес уларни яна бир марта жазолади. Алексис жарима майдончаси остонасида 3-4 нафар ҳимоячини чалғитиб, "тўққизлик"ка тўпни "михлади".

"Юнайтед" вазиятни ўнглашга ҳаракат қилди. Комбинациялар ташкил қилди. Аммо мезбонлар, жумладан, Петр Чех уларга гол уришга имкон бермади.

Бугунги натижадан кейин "Арсенал" очколар бўйича "МЮ"га етиб олди (16 очко). Улар "Манчестер Сити"дан кейин (18 очко) 2 ва 3-ўринларни бўлишиб туришибди.

АПЛ. 8-тур
Арсенал – Манчестер Юнайтед 3:0 (3:0, 0:0)
Голлар: 1:0 – 6 Санчес, 2:0 – 7 Озил, 3:0 – 19 Санчес.
Арсенал – Чех, Мертесакер, Монреаль, Бельерин, Габриэл, Ўзил (Окслейд-Чемберлен, 75), Рэмзи, Уолкотт (Жиру, 75), Касорла, Санчес (Гиббс, 81), Коклен.
Манчестер Юнайтед – Де Хеа, Блинд, Смоллинг, Дармиан (Валенсия, 46), Мата (Уилсон, 82), Янг, Кэррик, Швайнштайгер, Депай (Феллайни, 46), Руни, Марсьяль.
Огоҳлантиришлар: Янг (22), Дармиан (30), Коклен (51), Руни (55).