Кеча Қатар пойтахти Доҳа шаҳрида бокс бўйича Жаҳон чемпионати баҳсларига старт берилди. Терма жамоамизнинг икки вакили дастлабки саралаш баҳсларини ўтказишди.
56 кг. вазн тоифасида Муроджон Аҳмадалиев италиялик Францеско Майеттога қарши жангда ишончли ғалабани қўлга киритди. Ҳакамларнинг учаласи барча раундларда ҳамюртимизнинг ғалабасини қайд этишди — 30-27, 30-27, 30-27.
Муроджон нимчорак финалда мазкур вазннинг биринчи рақамли боксчиси, қозоғистонлик Қайрат Ералиевга қарши рингга кўтарилади. Хабарингиз бор, яқинда Таиландда ўтказилган Осиё чемпионатида Муроджон 2-ўринни, Ералиев эса 3-ўринни эгаллаганди. Қитъа чемпионатида уларнинг йўли кесишмаганди.
75 кг.гача бўлган вазнда эса Бектемир Мелиқўзиев грузиялик Заал Квачатзега қарши саралаш жангини ўтказди. Ўзбекистонлик ёш боксчи 1-раунднинг ўзида рақибини нокаутга учратди. Баҳс 1 дақиқаю 45 сонияда якунланди. Мелиқўзиев нимчорак финал баҳсини франциялик Кристиан Мбилли Ассомга қарши рингга кўтарилади.
Бугун, 7 октябрь куни 60 кг вазндаги Элнур Абдураимов жазоирлик Редда Бенбазиз билан, +91 кг вазндаги вакилимиз Баҳодир Жалолов Жазоирнинг яна бир вакили Муҳаммад Гримес билан, 81 кг вазндаги тажрибали Элшод Расулов эса венесуэлалик Альберто Рамреа Дурано билан жанг ўтказади.
