Бугун юртимизда олтин куз. Халқимиз йил давомида далаларда пешона тери билан бунёд бўлган мўл-кўл ҳосилни йиғим-теримига катта эътибор қаратилмоқда. Бободеҳқон қадоқ қўли билан яратилган пахта ҳосилини йиғиштириб олиш ишлари қизғин давом этяпти.
Умумхалқ ҳашарида қатнашишни ўзига шараф деб билган “Қизилқум” ПФК жамоаси ҳам куни кеча пахтакорларга ёрдамга ошиқди. Футболчи йигитлар билан бир қаторда “Қизилқум — Гули” жамоаси қизлари ҳам клуб раҳбарияти ташаббусини қўллаб-қувватлашди.
Жамоамиз аъзолари Навоий туманидаги пахтазорларда деҳқонларимизга камарбаста бўлдилар. Ҳашарда иштирок этган юз нафардан зиёд “Қизилқум” футболчи йигит-қизлари кун давомида 2180 килограмм пахта териб, юртимиз хирмонига ўзларининг муносиб улушларини қўшди.
— Ўзбекистонда беш йилдан бери тўп сураётган бўлсам, илк маротаба бундай ҳашарда иштирок этишим, — дейди грузиялик легионер Георгий Квесиешвили. — Эгнимизда кўркам ва бежирим либос кийишни барчамиз хоҳлаймиз. Аммо бу кийимларимизни қанчалик катта заҳмат эвазига яратилишини ҳашарда қатнашиб, юракдан ҳис қилдим. Пахтакорларнинг машаққатли юмушларини кўриб, ҳосилни йиғиб териб олишга озми-кўпми ҳисса қўшганимдан жуда хурсандман.
