Баҳрайн ва Ўзбекистон терма жамоалари ўртасидаги ўйиндан кейин матбуот анжумани ташкил этилди. Унда дастлаб Самвел Бабаян иштирок этди ва журналистларнинг саволларига жавоб қайтарди.

— Аввало, бугунги ғалаба билан ўзбекистонлик футбол мухлисларини табриклайман. Бугунги ғалабани терма жамоанинг ҳақиқий мухлисларига бағишлайман. Ўйинга тўхталадиган бўлсам, биринчи бўлим давомида биз ўйинни назорат қилдик. Иккинчи бўлимда эса вазиятлардан фойдалана олдик. Ўйиндан ўйинга кучайиб бораётганимиз кўриниб турибди. Бизнинг вазифамиз ҳар бир ўйинда майдонга чиқиб, тўла куч билан ўйнаш ва ўз мақсадимизга эришишдан иборат.

— Танаффусда шогирдларингизга нималарни таъкидладингиз? Иккинчи бўлимда тактикада қандай ўзгартириш киритдингиз?
— Айтиб ўтганимдек, биринчи бўлимда ҳам ўйин назорати бизнинг ихтиёримизда бўлди. Иккинчи бўлимда ҳам тартибли ўйнашда давом этдик ва ўйлаган режамизни амалга ошира олдик. Нимага ўзгартириш киритиш борасидаги саволга эса ҳозирча жавоб бермайман, боиси, ҳали Баҳрайн билан жавоб ўйинимиз бор.

— Баҳрайн терма жамоаси аввалги турда Яманни қарши яхши ўйин кўрсатиб, йирик 4:0 ҳисобида ғалаба қозонганди. Бугун эса Ўзбекистон Баҳрайнни йирик ҳисобда мағлуб этди. Нима деб ўйлайсиз, бугун Баҳрайн кучсиз ўйнадими ёки Ўзбекистон кучли ўйин намойиш қилдими?
— Бугун Баҳрайн кучсиз ўйнади десам, ноҳақлик қилган бўламан. Биз рақибни яхши ўргангандик. Жамоанинг КХДР ва Яманга қарши ўйинларини кўриб чиққандик. Жамоа Шимолий Корея билан ўйинда мағлубиятга муносиб эмасди. Менимча, бугунги йирик ғалаба — бу бизнинг меҳнатларимиз самараси. Биз ўйинни тўғри йўлга қўйиб, Баҳрайннинг кучли томонларини ёпа олдик, рақибга ҳужум ташкил қилиш имконини бермадик. Натижада ўз дарвозамиз дахлсизлигини сақлаб қолдик. Ҳужум чизиғимизда кучли футболчилар ўйнаётгани, улар бир-бирларини яхши тушуниб бораётгани натижасида 4та гол урдик.