Бир пайтлар Европа яшил майдонларини зир титратган футболчиларнинг бугун қаерда экани футбол ишқибозларини қизиқтирса, ажаб эмас. Баъзи машҳурлар Америка чемпионатига йўл олган бўлса, айримлар Осиёга ташриф буюрган. Шунингдек, бу машҳурлар орасида омадини яқин-яқиндан бери ривожланиш йўлига кирган Ҳиндистон суперлигасида синаб кўришга қарор қилганлар ҳам кўпчиликни ташкил этади. Бугунги саҳифамизда ана шу футболчилар ҳақида сўз юритамиз.
Элдер ПОШТИГА
Ёши: 33 да
Карьерасидаги энг машҳур клублар: «Спортинг», «Валенсия», «Тоттенхэм»
Ҳозирги клуби: «Атлетико» (Калькутта)
Португалия термаси сафида 71 та матч ўтказган футболчи айни дамда Ҳиндистон суперлигасининг асосий ўйинчиларидан бири ҳисобланади.
Иан ХЬЮМ
Ёши: 31 да
Карьерасидаги таниқли клуб: «Лестер»
Ҳозирги жамоаси: «Атлетико» (Калькутта)
Янги мавсумни ҳам «Бенгал йўлбарслари» сафида давом эттираётган футболчи ўтган мавсумнинг энг яхши ўйинчиси ҳисобланади. Эдинбургда туғилган хавбек Канада терма жамоаси шарафини ҳимоя қилади.
Марко МАТЕРАЦЦИ (мураббий)
Ёши: 42 да
Карьерасидаги таниқли жамоалар: «Эвертон», «Интер», Италия терма жамоаси
Ишлаётган жамоаси: «Ченнай Титанс»
Италиялик собиқ футболчи ўтган мавсумда Ҳиндистонда мураббийлик фаолиятини бошлади. Бу унинг биринчи мураббийлик иши бўлса-да, «Ченнай Титанс» клубининг ўйинлари илиқ таассурот қолдирди.
ЭЛАНО
Ёши: 34 да
Карьерасидаги машҳур клублар: «Сантос», «Шахтёр», «Манчестер Сити», «Галатасарой»
Ҳозирги клуби: «Ченнай Титанс»
Бразилиялик иқтидорли футболчи ўтган мавсумда 1 миллион доллар эвазига «Ченнай Титанс» жамоаси билан 3 ойлик шартнома имзолаганди. У ишончни оқлади, саккизта гол билан энг яхши тўпурарлардан бирига айланди. 2015 йил бошида эса «Сантос» сафига қайтди. Аммо кейинчалик яна «Ченнай»да ижара асосида тўп суришга қарор қилди. Ахир уч ойда 1 миллион ишлаб топиш кимга ҳам ёқмайди дейсиз.
Бернар МЕНДИ
Ёши: 34 да
Карьерасидаги машҳур клублар: «ПСЖ», «Халл Сити»
Ҳозирги клуби: «Ченнай Титанс»
Бернар кетма-кет иккинчи мавсумни ҳам «Ченнай» сафида ўтказмоқда.
Роберто КАРЛОС (мураббий)
Ёши: 42 да
Карьерасидаги машҳур клублар: «Реал», «Анжи», «Фенербахче», Бразилия терма жамоаси
Ҳозирги клуби: «Дели Динамос»
2014 йилда бразилиялик собиқ футболчи мураббий сифатида «Сивасспор» клуби билан ўз чемпионатида 5-ўринни эгаллади. Аммо кейинчалик бу жамоа келишилган ўйинларда айбдор деб топилгач, Карлос Қатарга йўл олди. Ундан сўнг эса Ҳиндистон суперлигасига келди. Айни дамда у «Дели Динамос» клубининг ўйновчи мураббийи ҳисобланади.
Йон-Арне РИИСЕ
Ёши: 35 да
Карьерасидаги машҳур жамоалар: «Ливерпуль», «Рома», Норвегия терма жамоаси
Ҳозирги клуби: «Дели Динамос»
Норвегиялик футболчи Ҳиндистонда нафақат футбол ўйнашга, балки иккинчи марта уйланишга ҳам улгурган. У ҳозирда жамоасининг асосий футболчиларидан бири саналади.
Флоран МАЛУДА
Ёши: 35 да
Карьерасидаги машҳур жамоалар: «Лион», «Челси», Франция терма жамоаси
Ҳозирги клуби: «Дели Динамос»
ЗИКО (мураббий)
Ёши: 62 да
Карьерасидаги машҳур жамоалар: «Фламенго», «ЦСКА» (Москва), Бразилия терма жамоаси
Бошқараётган клуби: «Гоа»
Бразилиялик футбол афсонаси Ҳиндистон суперлигасининг энг бой клубларидан бирини қаторасига иккинчи мавсумда ҳам бошқармоқда.
ЛУСИО
Ёши: 37 да
Карьерасидаги машҳур жамоалар: «Бавария», «Интер», «Ювентус», Бразилия терма жамоаси
Ҳозирги клуби: «Гоа»
Лусио айни дамда «Гоа»нинг марказий ҳимоячиси ва Зиконинг ўнг қўли ҳисобланади.
Питер ТЭЙЛОР (мураббий)
Ёши: 62 да
Карьерасидаги машҳур жамоалар: «Тоттенхэм», Англия терма жамоаси
Ҳозирги клуби: «Керала Бластерс»
Бир неча йил олдин Тэйлор Баҳрайн терма жамоасини бошқарганди. Аммо кейинчалик у ҳам Ҳиндистонда фаолият юритишга қарор қилди.
Карлос МАРЧЕНА
Ёши: 36 да
Карьерасидаги машҳур жамоалар: «Валенсия», Испания терма жамоаси
Ҳозирги клуби: «Керала Бластерс»
Лақаби Марченбауэр бўлган бу футболчи ўз вақтида «Валенсия»нинг кўп йиллик сардори ҳисобланган. Энди эса бу вазифани «Керала Бластерс» сафида бажармоқда.
Николя АНЕЛЬКА (мураббий)
Ёши: 36 да
Карьерасидаги машҳур жамоалар: «Арсенал», «Реал», «Манчестер Сити», «Челси», Франция терма жамоаси
Ҳозирги клуби: «Мумбай Сити»
Анелька икки мавсумдан бери шу жамоани бошқариб келади.
СИМАУ
Ёши: 35 да
Карьерасидаги машҳур жамоалар: «Спортинг», «Бенфика», «Барселона», «Атлетико», Португалия терма жамоаси
Ҳозирги клуби: «NorthEast United FC»
«NorthEast United FC» клуби билан уч ойлик шартнома имзолаган Симау аллақачон жамоа сардорига айланиб улгурди.
Диоманси КАМАРА
Ёши: 34 да
Карьерасидаги машҳур жамоалар: «Вест Бромвич», «Фулхэм», Сенегал терма жамоаси
Ҳозирги клуби: «NorthEast United FC»
Дэвид ПЛАТТ (мураббий)
Ёши: 49 да
Карьерасидаги машҳур клублар: «Ювентус», «Сампдория», «Арсенал», Англия терма жамоаси
Ҳозирги клуби: «Пуна Сити»
Узоқ вақт «Манчестер Сити» академиясида фаолият юритган мутахассис шу йилнинг ёзида Ҳиндистонга кўчиб ўтди.
Дидье ЗОКОРА
Ёши: 34 да
Карьерасидаги машҳур жамоалар: «Тоттенхэм», «Севилья», Кот-д’Ивуар терма жамоаси
Ҳозирги клуби: «Пуна Сити»
Адриан МУТУ
Ёши: 36 да
Карьерасидаги машҳур жамоалар: «Парма», «Челси», «Ювентус», «Фиорентина», Руминия терма жамоаси
Ҳозирги клуби: «Пуна Сити»
Ҳиндистон суперлигаси ҳақида қисқача:
3 октябрдан 6 декабргача саккизта жамоа бир мартадан тўқнаш келишади. Шулардан тўртта жамоа плей-офф босқичига йўл олади. Кейин эса иккита ўйиндан иборат ярим финал босқичи ўтказилади. Иккала ўйин натижасига кўра ғолиб бўлган клублар эса финалда тўқнаш келишади. Финал бошқа клубга тегишли бўлган бирор-бир стадионда ўтказилади ва ғалаба қозонган жамоа суперлига чемпиони ҳисобланади.
Интернет материаллари асосида НИЗОМ тайёрлади
