Эртага Ўзбекистон Кубоги финали. Бугун кубок финалининг меҳмон жамоаси бўлмиш “Насаф” футболчилари “Суғдиёна” стадионида машғулот ўтказишди. Мухлисларга шуни етказишни ҳоҳлар эдикки, барча футболчиларнинг кайфияти аъло даражада, улар финал учрашувига тайёр.
Бугун “Насаф” ПФК делегацияси билан янги барпо этилган ва финал учрашуви бўлиб ўтадиган стадионни ҳам бориб кўрдик. Биз шунингдек стадионда Қашқадарёлик мухлислар учун ажратилган секторларни ҳам кўздан кечирдик, улар учун стадионда 2, 3 ва 4-секторлар ажратилган. Қарши шаҳрида сотилган чипталар ҳам ана шу секторларга сотилган. Ушбу секторлар деярли майдон марказининг тўғрисида жойлашган.
Аммо биз шу нарсага гувоҳ бўлдикки, “Насаф” ПФК ходимларининг қўл телефонларига чипта сўраб қўнғироқ қилган мхлислар сони жуда кўпчиликни ташкил қилаяпти. Шу ерда маълумот тариқасида айтиб ўтмоқчимиз, Қарши шаҳрида сотилмай қолган чипталар кеча Жиззах шаҳрига қайтарилган ва стадионнинг 3-чиптахонаси орқали бугун ва эртага ҳам сотилади. Меҳмонлар учун ажратилган 2 ва 3-секторларга чипталар деярли сотиб бўлинган, аммо 4-секторга чипталар мавжуд, эслатиб ўтамиз ҳар бир секторда 1100тага яқин ўриндиқлар бор.
Кейинги хабарларимизда Қашқадарёдан ташриф буюрган ва улар билан бирга финал учрашувини томоша қилиш истагида бўлган мухлислар учун ажратилган секорларга бориш ва кириш тартиблари билан таништириб ўтамиз.
Жиззах шаҳрида футбол байрами кайфияти ҳукм сурмоқда. Биз бу ерда яна бир қувонарли ҳолатга гувоҳ бўлдикки, маҳаллий мухлисларнинг аксарияти эртага “Насаф”га мухлислик қилиш истагидалар.
ОАВлари учун ажратилган жойни ҳам кўздан кечирдик, улар учун 80та ўриндиқ бор, усти очиқ сектор. Бизга стадион ходимларининг маълум қилишича эртагача секторга электр тармоғи (розеткалар) ўрнатилади аммо Wi-Fi интернет тармоғи мавжуд эмас. Финалга ташриф буюраётган ОАВ ходимлари ана шу мавжуд шароитларни ҳисобга олишларини сўраган бўлар эдик.
Суратларни Сардор Нуров олган
