Бугун “Локомотив” футбол клубида йиғилиш бўлиб ўтди. Раҳбарият ҳамда таъсисчилар томонидан ўтказилган мазкур йиғилишда жамоамиз бош мураббийи Вадим Абрамов клуб раҳбарияти қарорига кўра, ўз лавозимидан бўшатилгани маълум қилинди.

Хабарингиз бор, кеча бўлиб ўтган олий лиганинг 25-турида Қўқонга сафар қилган “Локомотив” олий лига дебютанти билан 2:2 ҳисобида дуранг ўйнаб қайтди. Бу ўйинда “темирйўлчилар” 2:0 ҳисобида олдинда боришаётганди, бироқ баҳс тугашига 20 дақиқадан сал кўпроқ вақт қолганида ўз дарвозамиздан иккита гол ўтказиб юбордик. Натижада “Локомотив” ютиши керак бўлган учрашувда дуранг қайд этди.

Бу натижа эса табиийки клуб раҳбарларини асло қониқтирмади, чунки чемпионлик учун имконият яна пасайди. Қолаверса, асосий рақобатчимиз “Пахтакор” кеча ғалаба қозонди.

Биз шунга қарамай, Вадим Абрамовга “Локомотив” футбол клуби билан ўзаро ҳамкорлик қилгани учун миннатдорчилик билдирамиз. “Локомотив” Вадим Абрамов қўл остида йил бошида Ўзбекистон Суперкубогини қўлга киритди. ОЧЛда кимсан “Ас-Садд” устидан Тошкентда 5:0 ҳисобида ғалаба қозондик. Қолаверса, “Бунёдкор” олий лиганинг ҳар иккала учрашувида мағлуб этилди ва бу воқеа клуб тарихида илк бор рўй берди.

Вадим Абрамов билан биргаликда жамоани ёрдамчи мураббий Марат Мифтахутдинов ҳам тарк этди. Эндиликда мавсумнинг қолган бешта ўйини учун Андрей Микляев – Мирко Йелечич тандеми клуб натижаларига жавоб беради.