Испания чемпионатининг 8-тур марказий баҳси доирасида пешқадамлар сафида бораётган икки жамоа тўқнаш келди. Шу пайтгача жадвални бошқариб келаётган "Вильярреал" ўз майдонида "Сельта"ни қабул қилди.

Биринчи бўлим сўнгида виголиклар футболчиси Орельяна ҳисобни очди. Иккинчи бўлим бошида мезбонлар ҳимоячиси Байи тўпни қўли билан ўйнагани учун иккинчи сариқ карточкани олиб, майдонни тарк этди. Шунга қарамай, "сариқ сувости кемаси" Денис Суареснинг голи эвазига ҳисобни тенглаштиришга муваффақ бўлди. Ўйиннинг сўнгги дақиқасида эса Нолито "Сельта"га ғалаба келтирувчи гол муаллифига айланди.

Ушбу ғалабадан кейин "Сельта" очколар сонини 18тага етказган ҳолда, "Реал" ва "Барса"га тенглашиб олди. Тўплар нисбатига кўра улар 2-ўринга жойлашишди. "Вильярреал" эса 16 очко билан 4-ўринга тушди. Бугун "Атлетико" ғалаба қозонса, мадридликлар бу жамоани 5-ўринга тушириб юборишади.

Испания Ла лигаси, 8-тур
Вильярреал – Сельта 1:2 (0:1, 1:1)
Голлар: 0:1 – 41 Орельяна, 1:1 – 67 Суарес, 1:2 – 90 Нолито.
Вильярреал – Ареоля, Байи, Коста, Марио Гаспар, Руис, Саму (Суарес, 51), Пина, Тригерос, Науэль (Рукавина, 51), Баптистао (Бакамбу, 59), Сольдадо.
Сельта – Альварес, Кабраль, Кастро, Мальо, Гомес, Эрнандес (Бонгонда, 73), Фернандес, Орельяна, Васс (Радоя, 86), Нолито, Аспас (Гвидетти, 81).
Огоҳлантиришлар: Байи (36), Фернандес (36), Гомес (37), Васс (43), Сольдадо (71).
Четлатиш: Байи (47).