Италиядаги модалар уйи Giorgio Armani Германиянинг "Бавария" жамоаси футболчилари учун либос тикади. Томонлар кейинги 3 йил давомида ҳамкорлик қилиш бўйича келишувга эришишган. Бу ҳақда немисларнинг WWD нашри хабар берган.
Armani футболчилар учун расмий маросимларда кийиладиган либослар тайёрлаб беради. Дизайнерлар томонидан футболчилар учун кашмири ва ипак матоларидан қора-кўк ранли костюмлар, нимчалар, шимлар, оқ кўйлаклар ҳамда свитерлар тикилади. Бундан ташқари, модалар уйи "Бавария" аъзоларини қуёшдан ҳимоя қилувчи кўзойнаклар ва спорт сумкалари билан таъминлайди.
Қайд этиш керакки, бу Giorgio Armani томонидан спортчилар учун кийим тикиб берилиши бўйича биринчи шартнома эмас. 2007-2009 йиллар давомида компания "Челси" футболчиларини кийинтирганди. Бироз аввалроқ эса Италия олимпиячилари ва паралимпиячиларини 2016 йилги олимпия мусобақаларига кийинтириш бўйича шартнома тузилган.
Маълумот учун, Giorgio Armani компаниясига 1975 йилда италиялик модельер Жоржио Армани томонидан асос солинган, унга Сержио Галлеоти ёрдамчи бўлганди. Улар шу вақтгача Giorgio Armani, Emporio Armani, Armani Exchange, Armani Jeans, Armani Junior, Armani Casa ва бошқа брендлар остида эркаклар, аёллар ҳамда болалар учун кийим-кечак, оёқ кийимлари ҳамда соатлару аксессуарлар ишлаб чиқариш билан шуғулланади.
Армани Италиянинг энг бадавлат кишиларидан бири ҳисобланади. У Форбс журнали версиясига кўра 7 млрд евро бойликка эгалик қилади.
