“Шўртан” — “Қизилқум” жамоалари (1:3) учрашувидан сўнг ўтказилган матбуот анжумани биринчи қисмида меҳмонлар бош менежери Ҳамиджон АКТАМОВ иштирок этди.
—Ўтган турда ўз майдонимизда аламли мағлубиятга учрагандик, — дея сўз бошлади Ҳамиджон Ғуломович. — Тенг курашлар остида кечган баҳсда “Машъал”га имкониятни бой берганимиз мухлисларимизни қаттиқ ранжитган эди. Ана шундай омадсиз ўйиндан кейин йигитларимизни навбатдаги турга тайёрлаш осон эмасди. Хайриятки, бугун меҳмонда тўп суришимизга қарамай, жамоамизнинг барча аъзолари бир тану бир жон бўлиб, ғалаба иштиёқида ўйнадилар. Барча йигитларимизга раҳмат айтаман. Албатта, бугун кўрдиларингиз, Навоийдан ҳам юзлаб мухлисларимиз Ғузорга ташриф буюриб, футболчиларимизни фаол қўллаб-қувватлаб турдилар. Уларнинг далдаси жамоамиз учун катта мадад бўлди, десам хато қилмайман.
—Ўйинда биринчи бўлиб ўз дарвозасидан тезкор гол ўтказиб юбориш ҳар қандай жамоага салбий ва руҳий таъсир қилиши табиий. Бугун йигитларимиз чинакам ирода намойиш эта олдилар ва шунинг эвазига муҳим уч очкони қўлга киритдик.
—“Шўртан” — анча шаклланган жамоа. Бу ерда малакали мураббий ишлайди, тажрибали ўйинчилари кўп. Бугунги ўйинда улар таркибида кўпроқ ярим ҳимоячи Элдор Бойматовнинг ўйини менга ёқди.
—Амалдаги мавсумда ким чемпион бўлади? Қизиқ савол бўлди-ку?! Ҳали чемпионат тугашига яна тўртта тур бор. Бунга фақат охирги турдан кейингина аниқ жавоб беришим мумкин.
—Охирги сўз ўрнида шуни айтишни истардимки, мен “Қизилқум” жамоаси билан биринчи марта Ғузорга келишим. Рости, воҳанинг бир туманида бу каби ажойиб футбол муҳити, чиройли стадионни кўриб жуда хурсанд бўлдим. Бунақа футбол майдонида тўп суришни кўп жамоалар орзу қилса ажабмас. Бугун йигитларимиз мазза қилиб тўп тепишди. Футбол учун шунақа шарт-шароитларни яратиб берган “Шўртан” футбол клуби хомийлари ва раҳбариятига ўз миннатдорчилигимни билдираман.
