Испания чемпионатининг 9-тури доирасида бугун "Сельта" ўз майдонида "Реал"ни қабул қилади. Айни дамда турнир жадвалининг биринчи ва иккинчи поғоналарини эгаллаб турган жамоаларнинг ўйини ҳеч кимни бефарқ қолдирмаса керак. Ўйинга превью шаклида тўхталиб ўтамиз.
Мусобақа жадвалидаги ҳолат
Мавсум сўнгида виголиклар жадвалнинг қайси поғонасида бўлишини айтиш қийин, аммо ҳозир улар ажойиб ўйин кўрсатиб, ҳақли равишда грандлар билан ёнма-ён боришмоқда. "Сельта" ўз майдонида "Барселона"ни йирик ҳисобда мағлуб этди, сафарда мусобақа пешқадами "Вильярреал"дан 3 очко олди. Қизиқ томони, бу икки жамоа Ла лиганинг ушбу мавсумида ҳали мағлубиятга учрашмади, фақат 3 мартадан дуранг ўйнашди. "Барселона" мазкур турда "Эйбар"ни қабул қилиб, катта эҳтимол билан ғалаба қозонишини инобатга олсак, "Сельта" - "Реал" ўйинидан кейин "қойилмақом учлик"ка путур етади. Ютқазган жамоа рақиблардан 3 очкога ортда қолади, дуранг эса ҳар иккала жамоани каталонияликлардан 2 очколик масофага суриб қўяди.
Жамоалардаги янгиликлар
СЕЛЬТА
"Сельта" лагеридан сўнгги қайноқ янгилик — бу жамоа етакчиси Нолито билан боғлиқ. Маълумотларга кўра, клуб раҳбарияти ҳужумчи билан янги шартнома имзолаб, унинг товон пули миқдорини кўтариб қўймоқчи. Шунингдек, "Барселона" январь ойидаёқ Нолитони сотиб олиши мумкинлиги ҳақида маълумотлар бор. Футболчининг ўзи эса қишда жамоани тарк этиш нияти йўқлигини таъкидламоқда.
Айтиб ўтганимиздек, "Сельта" ўтган турда "Вильярреал"ни мағлуб этганидан кейин жамоанинг кайфияти аъло даражада. "Эйбар" ва "Хетафе" билан ўйиндаги дуранг натижалар энди эсдан чиқарилган. Дарвоқе, "сариқ сувости кемаси"га қарши ўйинда айнан Нолито баҳс сўнгида ғалаба тўпини киритишга муваффақ бўлганди.
РЕАЛ МАДРИД
"Реал" Ла лигадан ташқари Чемпионлар лигасида ҳам иштирок этаётганидан хабарингиз бор. Мадридликлар сўнгги турда "ПСЖ" майдонида голсиз дурангга имзо чекишди. Бу "Мадрид" учун 2008 йилдан бери ЕЧЛ гуруҳ босқичида гол ура олмаган илк ўйин бўлди.
Бунгача кўпгина ўйинларда Кейлор Навас қийин вазиятларда жамоа дарвозаси дахлсизлигини сақлаб қолаётган бўлса, Париждаги ўйинда бутун жамоа ҳимояда тартибли ўйнади ва коста-рикалик дарвозабон қаҳрамонлик кўрсатишига имконият қолдирмади.
Тахминий таркиблар
СЕЛЬТА
"Сельта" таркибида деярли йўқотишлар йўқ. Фақат ҳимоячи Андреу Фонтас жароҳат олган. Серхио Гомес унинг йўқлигини билдирмайди. Боз устига жамоа бош мураббийи Эдуардо Бериссо бошланғич таркибни аввалдан эълон қилиб юборди.
РЕАЛ МАДРИД
"Қаймоқранглилар" таркибида бир қатор муаммолар бор. Рафаэль Бенитес жароҳатлар туфайли анчадан бери оптимал такрибни майдонга тушира олмаяпти. "Сельта" билан ўйин ҳам бундан мустасно бўлмаса керак. Пепе, Карвахаль, Арбелоа, Хамес, Бэйл, Бензема бу учрашувда иштирок эта олмасликлари аниқ. Боиси, улар ўйин "заявка"си киритилишмади. Ярим ҳимоячилар Ковачич ва Модрич ҳозирда оптимал формада эмаслар. Шунингдек, клуб сардори Серхио Рамос ҳам жамоага ёрдам бера олмаслиги мумкин. У Париждаги ўйиндан кейин елкасида яна оғриқ ҳис қила бошлади. Шундай бўлса, Варан-Начо ҳимоя жуфтлиги "Сельта"нинг Нолито-Аспас-Орельяно учлигига қарши ўйнаши осон бўлмайди.
Ўйиндан олдинги фикрлар
Эдуардо Бериссо, "Сельта" бош мураббийи.
— Биз юқори интенсивлик билан ҳаракат қилишимиз керак. Шунингдек, тезлик эвазига рақибнинг босимига дош беришимиз керак. "Мадрид" жуда хавфли рақиб ҳисобланади. Жамоа юқори аниқликда ҳаракат қила олади.
Рафаэль Бенитес, "Реал" бош мураббийи:
— Бизни жуда қийин ўйин кутиб турганини биламиз. "Сельта" жуда фаол намойиш қилади. Улар майдонда ўзларини ишончли тутишади. Жамоа майдонда бор кучини бериб ўйнайди. Сўнгги учрашувни ўтказганимизга бор-йўғи икки ярим кун бўлди. Шунга қарамай, биз 3 очкони қўлга киритишимиз керак. Баъзи жамоалар бошқаларга нисбатан кўпроқ ўйин ўтказишини унутмаслик керак. "Сельта" шу пайтгача фантастик ўйин намойиш қилиб келмоқда, аммо биз чизиқлар орасидаги боғлиқликни ушлашимиз керак.
Тахмин
"Сельта" таркиб ва ўйин борасида ҳозирда ажойиб формада. "Реал" эса бир қатор муаммоларга эга. Шунингдек, "ПСЖ"га қарши қийин кечган ўйиндан кейин мадридликлар қанчалик жисмонан тиклана олишига кўп нарса боғлиқ. Биз ҳисобни тахмин қилишдан ўзимизни тиямиз. Бу ишни сизга ҳавола қиламиз, азиз мухлис.
