Хабарингиз бор, айни дамга келиб Олий Лига ўйинлари ўзининг ҳал қилувчи палласига кириб улгурди.

Диққатга сазовор жиҳати шундаки, мамлакат чемпиони бўлиш учун бир вақтнинг ўзида 3 та жамоа кураш олиб бормоқда. “Пахтакор”, “Локомотив” ҳамда “Насаф” жамоалари мусобақа жадвалида кетма-кет жойлашишган ва уларнинг орасидаги фарқ унча катта эмас.

“Шерлар” жамоаси етакчиларидан бири бўлиб улгурган Аднан Ораховацнинг айтишича, “Пахтакор” қолган 4 та учрашувни ҳам ўз фойдасига ҳал этишга уринади.

- Бизни олдинда осон ўйинлар кутаётгани йўқ. Масалан, келаётган турда “Динамо” билан ўйнаймиз. Самарқанд жамоаси ҳам анчагина шаклланган футболчилардан иборат. Уларнинг таркибида ҳам бир қатор тажрибали ўйинчилари бор. Аммо биз бу сафар ҳам фақат ғалаба илинжида майдонга чиқамиз. Биз ўз уйимизда ўз ишқибозларимиз қаршисида ўйнаймиз. Шу сабабдан ҳам рақибдан кучли эканимизни исботлашимиз шарт.

Чемпионлик учун кураш эса жуда қизғин кўриниш олди. Биз ҳамон мусобақа жадвалида биринчи ўриндамиз. Лекин бўшашишга ҳаққимиз йўқ. Биз олдиндаги 4 та учрашувнинг барчасини ютишимиз лозим. Зеро, мамлакат чемпиони бўлишни мақсад қилганмиз, - дейди ҳимоячи SPORTS.uz мухбирига.

Таъкидлаб ўтамиз, “Пахтакор” навбатдаги ўйинини 26 октябр куни “Динамо”га қарши ўтказади.