Бугун бўлиб ўтган "Шўртан" - "Машъал" (1:0) баҳсидан сўнг ҳар икки жамоа бош мураббийлари ўйин ҳақида фикрларини билдириб ўтди.

Матбуoт анжуманининг иккинчи қисмида мезбонлар бош мураббийи Мухтор Қурбонов иштирок этди.

"Ўйин жуда оғир кечди. "Машъал"да жуда кўп имконият бўлди. Ўтган баҳсдаги аламали мағлубиятдан сўнг йигитлар ўзларига келиб олишлари қийин кечди. Шукурки гол уриб ғалабага эришдик", - дейди Қурбонов.

"Машъал"ни йил бошида ПФЛ кубогида ҳам мағлуб этгандик, биринчи даврада ҳам ютгандик, бугун ҳам ютдик. Футболда шундай, баъзида омадли серия бўлади, баъзида омадсиз. Бугун Муборак клуби ғалабага эришиши ҳам мумкин эди. Бугун Элдор Бойматов машғулотларда ўзини яхши ҳис қилмагани учун, озгина чарчоқ аломатларини сезганим учун уни захирада қолдиришга қарор қилдим. Мавсум тугаб бормоқда. "Шўртан" бу йил барқарор ўйнай олмади. Кучли клублар билан баҳсларда очколар олдик, ютишимиз керак бўлган ўйинларда эса ютқазиб қўйдик.
Игорь Таран "Бухоро"га қарши ўйиндан олдин шифохонага тушиб қолганди. Яқинда уйига қайтиб келди. Кейинги баҳсда майдонга тушиши мумкин.