Хабар қилинишича, Ўзбекистон олимпия терма жамоаси декабрь ойида БААда ўтказиладиган 2та йиғини доирасида нақ 7та ўртоқлик ўйини ташкил этар экан.
Бир қарашда, ҳаммаси ажойиб. Ахир биз доимо ўртоқлик-назорат учрашувлари озлигидан шикоят қиламиз. Бу ерда эса, 20-22 кунга чўзиладиган 2та йиғин учун 7та ўйин. Шу жойда меъёр бузилмаяптимикин? Савол туғилади: ўртоқлик баҳсларининг асосий вазифаси нима? Ҳа, яшанг, ўйин вариантлари ва таркибни аниқлаш. Билишимча, Виктор Жалилов Дубайдаги йиғинларга Осиё чемпионатида ўйнайдиган футболчиларни олиб боради. Демакки, таркиб масаласи ҳал этилган бўлади. Демоқчиманки, фақат ўйин ишланмаларини кўриш учунгина деярли кунора майдонга тушиш ёш футболчиларимизга салбий таъсир қилмасмикин? Зеро, уларни олдинда жиддий рақиблар билан жиддий ўйинлар кутиб турибди. Ҳар қандай ҳолатда ҳам, олимпиячиларимизга бўлажак чемпионатда омад тилайман. Фақат, тайёргарлик жараёнида меъёр бузилмаса, бас.
Жаҳонгир ПЎЛАТОВ, Чортоқ тумани.
